Kryetari i Komitetit të Çështjeve të Jashtme në Kongresin Amerikan, Eliot L. Engel, ka reaguar lidhur me zgjedhjet monopartiake të 30 qershorit. Eliot L. Engel, një mik i Shqipërisë dhe njohës i mirë i zhvillimeve në Tiranë, thotë se palët duhet të ulen në dialog.
Engel thotë se shqiptarët meritojnë të bëjnë zgjedhje me standarde demokratike. Ndërkohë procesi që po bën PS me 30 qershor, nuk është me standarde, nuk është konkurrues dhe nuk është as demokratik.
Ajo që bie në sy në deklaratën e Engel është se ndryshe nga qëndrimet e tjera të ndërkombëtarëve që mbështesin PS-në dhe 30 qershorin, theksi vihet të standardet demokratike. Ndërkohë që dihet edhe nga vet socialistët se zgjedhjet pa opozitën pa kandidatë rivalë nuk quhen demokratike.
Deklarata e plotë e Eliot Engel:
“Shqipëria ka bërë hapa të mëdhenj që prej viteve të saj nën diktaturën e Hoxhës dhe populli shqiptar ka investuar shumë për të parë rrënjët e demokracisë së tyre. Marrëdhënia e fortë dhe e ngrohtë e SHBA-Shqipëri ka ndihmuar në nxitjen e këtyre zhvillimeve. Prandaj, unë jam shumë i shqetësuar nga ajo që dëshmoj në ditët dhe javët e fundit, pasi udhëheqësit politikë shqiptarë duket se kanë arritur një bllokim politik.
Në një përpjekje për të zvogëluar tensionet dhe për t’u larguar nga konfrontimet, u bëj thirrje të gjitha palëve të ushtrojnë kufizimet më të mëdha dhe të ndalojnë të gjitha aktet e dhunës. Kjo mosmarrëveshje mund të zgjidhet vetëm me dialog dhe sipas sundimit të ligjit.
Shqipëria është anëtare e NATO-s dhe meriton një të ardhme evropiane, por krizat e përsëritura rreth zgjedhjeve minojnë rrugën përpara. Unë i bëj thirrje popullit shqiptar të rifitojë veten për një angazhim politik paqësor dhe për një proces zgjedhor të denjë për një anëtar të familjes demokratike të Atlantikut të Veriut dhe kombeve demokratike”, thuhet në reagimin e Eliot.
