Kandidati për kryetar të bashkisë Lezhë, Eduart Ndocaj, përmes një deklarate ka mbajtur një qëndrim të ashpër ndaj rivalit të tij socialist Pjerin Ndreu, të cilin e ka konsideruar të padenjë për të përfaqësuar Lezhën dhe qytetarinë e saj.
Teksa e ka etiketuar si një kandidat që është përzënë në të gjitha vendet kur z. Ndreu ka garuar, Ndocaj, i ka kujtuar këtij të fundit, kohën kur ai ka kandiduar për LSI-në në zonën nr.9 të Pukës dhe ka marrë një minimum votash që tregon karakterin prej të padëshirueshmi që ka patur z. Ndreu dhe në vendlindjen e tij.
Në deklaratë, Eduart Ndocaj u ka kërkuar lezhianëve të mos japin votën për kandidatë që nuk i lidh asgjë me qytetin e tyre, por vijnë për të përfituar dhe për të grabitur nga pasuria dhe resurset e Lezhës.
Ja deklarata e plotë:
Bashkëqytetarë të nderuar!
Është një moment mjaft deciziv për vlerat e qytetarisë sonë dhe për identitetin kulturor të këtij qyteti me një histori mbresëlënëse.
Unë, jam në një garë që përvec synimit të fitores si kryetar bashkie, kam mbi supe përgjegjësinë dhe peshën e pashmangshme të hartimit dhe zbatimit të një vizioni pozitiv për Lezhën dhe krijon premisa zhvillimi dhe investimesh në sektorët jetikë të saj, duke ngjallur shpresë dhe besim për banorët e kësaj bashkie.
Mua më rivalizon në këtë garë, një kandidaturë e sektit të “rilindjes”, që përvec emrit si ish-polic i inkriminuar, nuk ka asgjë tjetër në karrierën e tij, pasi në cdo vend ku ai ka kandiduar, është përzënë në mënyrë të turpshme si i padenjë dhe jo përfaqësues.
Këtë gjë e dëshmon më së miri dhe vendlindja e tij, Puka, ku ai në vitin 2005, kandidonte për deputet nën siglën e LSI-së, duke marrë një minimum votash, gjë që tregon se sa i padëshiruar është kandidatura e tij, kudo që shkon ai.
Vëllezër dhe motra lezhianë!
Soj-sorrollopi i kandidatëve që vijnë për të vjedhur dhe për t’u pasuruar nga pronat dhe pasuritë tona, duhet të shporret nga lezha njëherë e përgjithmonë, pasi mjaft kemi vuajtur në kurrizin tonë të tillë drejtues, të cilët e zhytën Lezhën në varfëri dhe papunësi.
Unë, nuk premtoj asgjë më shumë, përvecse përkushtim dhe vizion të qëndrueshëm për zhvillimin e Lezhës, si një nga atraksionet dhe destinacionet më të fuqishme ekonomike, ku përmes programit të hartuar, synoj ringritjen dhe fuqizimin ekonomik të saj, duke konsideruar si prioritet të padiskutueshëm investimet dhe menaxhimin korrekt dhe me transparencë të fondeve të akorduara dhe të taksave të qytetarëve.
Më jepni mundësinë përmes votës suaj, të materializoj vizionin tim për Lezhën e shpresës dhe të perspektivës!
Votoni Eduart Ndocaj!
