Sekretari i Përgjithshëm i Aleancës Demokristiane, Eduart Ndocaj, përmes një postimi në rrjetet sociale ka falënderuar komunitetin shqiptar në Itali, të cilët në zgjedhjet e zhvilluara para pak ditësh për Parlamentin Europian kanë mbështetur fuqimisht Matteo Salvinin, duke bërë që partia e tij “Lega Nord”, të renditet e para dhe të dominojë dukshëm jetën politike në Itali.
Para pak ditësh, Ndocaj u shfaq në një takim elektoral në Pavia, në krah të zv.kryeministrit italian Salvini, duke dhënë mbështetjen e tij publike për përfaqësuesit e “Lega”-s.
Ndocaj, i ka falënderiar bashkëkombasit e tij, për mbështetjen dhe për votën e drejtë të dhënë në këto zgjedhje, duke orientuar vullnetin e tyre në kahjen e duhur për një Europë të drejtë dhe të denjë, për një Europë të afirmimit të vlerave integruese.
Mbështetja e madhe e shqiptarëve për Salvinin nuk ka kaluar pa vëmendje dhe nga ky i fundit, i cili përmes profilit të tij, ka falënderuar posacërisht shqiptarët, duke dëshmuar mirënjohjen e tij për komunitetin shqiptar, si dhe duke qenë një premisë e rritjes së mëtejshme të proceseve integruese të këtij komuniteti në vendin fqinj të Italisë.
Mbështetja publike që ofron Ndocaj ndaj “Lega-s” është në kuadër të marrëdhënieve reciproke, pasi përfaqësuesit e kësaj force politike, e cila është me mjaft ndikim, jo vetëm në Itali, por dhe jashtë saj, kanë nënshkruar një marrëveshje bilaterale bashkëpunimi dhe mbështetjeje. Përmes kësaj marrëveshjeje, Ndocaj, do të mbështetet dhe do të asistohet fuqishëm nga përfaqësues të “Lega-s” në zgjedhjet e 30 qershorit, ku “kaubojsi” është një kandidat potencial për kreun e bashkisë Lezhë.
