Koalicioni konservator që qeveris Australisë korri një fitore të papritur në zgjedhjet e përgjithshme që u zhvilluan të shtunën, duke sfiduar sondazhet e opinionit që i jepnin përparësi në këtë garë, partive opozitare të qendrës së majtë.
Kryeministri Scott Morrison e krahasoi fitoren Partisë Liberale që ai drejton, për një mandat të tretë, me lindjen e vajzave të tij, Abbey-t 11 vjeç dhe Lily-t 9 vjeç. Pas përpjekjeve pa sukses për 14 vjet për shtatzani duke përdorur metodën in-vitro, vajzat erdhën në jetë me lindje natyrale.
“Kam besuar gjithnjë në mrekulli” i tha 51 vjeçari Scott Morrison, një turme njerëzish të ngazëllyer në Sidnei ndërsa shpalli fitoren.
“Jam këtu me tre mrekullitë më të mëdha të jetës sime dhe sonte kemi arritur një tjetër mrekulli” tha ai.
Udhëheqësi i opozitës Bill Shorten, e kishte pranuar më parë humbjen, ndërsa koalicioni qeverisës siguroi shumicën në Dhomën e Përfaqësuesve të përbërë nga 151 vende. Numërimi i votave do të vazhdojë edhe të dielën.
“Jam i zhgënjyer për njerëzit që varen nga partia jonë, por unë jam i kënaqur që bëmë atë çfarë ishte e drejtë, jo atë që ishte më e lehtë” u tha ia mbështetësve të tij.
Zoti Shorten tha se nuk do ta udhëhiqte më Partinë e Punës pas gjashtë vitesh në krye të saj.
Gara e ngushtë ka rritur shanset që koalicioni të formojë një qeveri të pakicës. Konservatorët janë një qeveri e pakicës që kur larguan nga detyra e kryeministrit Malcolm Turnbull-in dhe vendosën në vend të tij Scott Morrison-in, pasojë e një lufte të brendshme për pushtet në gushtin e kaluar.
Sondazhet e opinionit para zgjedhjeve të së shtunës sugjeronin se koalicioni do të humbiste dhe se zoti Morrison do të kishte një nga mandatet më të shkurtra si kryeministër në historinë 118-vjeçare të federatës australiane.
Zoti Morrison e përqendroi fushatën e tij për të treguar se ndërsa parti e Punës ishte më popullore sesa qeveria, kryeministri i vendit (vetë ai) ishte më popullor se zoti Shorten./Voa
