Një raketë e kompanisë SpaceX u nis të enjten nga një bazë e Floridës për në Hënë, duke mbajtur një sondë robotike të Izraelit. Me këtë hap, Izraeli synon të bëhet vendi i katërt që zbarkon në satelitin e Tokës, pas Rusisë, Shteteve të Bashkuara dhe Kinës.
Sonda robotike quhet “Beresheet”, që në hebraisht do të thotë shprehjen biblike “gjeneza”, u ngrit në hapësirë nga Stacioni i Forcave Ajrore të Cape Canaveral në orën vendore 8:45 të mëngjesit. Ajo ishte e vendosur në majë të një rakete me 23 kate.
Beresheet, pritet të mbërrijë në Hënë pas gati dy muajsh. Zbarkimi është planifikuar për në datën 11 prill në Detin e Qetësisë. Sonda do të përshkojë për dy muaj në hapësirën kozmike rreth 6.5 milionë km.
Kryeministri Benjamin Netanyahu e quajti nisjen e sodës një hap përpara të teknologjisë izraelite.
“Ky është një hap i madh përpara jo vetëm për Izraelin, por edhe për teknologjinë e vendit. Disa orë më parë thasë se Izraeli po kthehet në një fuqi botërore që po rritet, që po rritet deri në Hënë. Kjo është një arritje e jashtëzakonshme. Tregon se për çfarë jemi të zotët.”
Beresheet peshon 585 kilogramë dhe kostoja e projektit është rreth 100 milionë dollarë.
