FUSHË ARRËZ, 10 Janar,/InfopressAlbania/.- Në bashkinë e Fushë-Arrëzit, reshjet e dendura të dëborës kanë krijuar problematika të mëdha në mbajtjen të qarkullueshme të disa akseve rrugore, kryesisht në segmentin Iballë- Fushë Arrëz, ku trashësia e dëborës arrin mbi 1 metër e gjysëm.
Me urdhër të Kryetarit të Bashkisë së Fushë Arrëzit, Fran Tuci, të gjitha Njësitë Administrative kanë nga një grup pune për ndjekjen, monitorimin dhe raportimin e situatës. Çdo grup pune koordinohet me kryetarin e bashkisë, i cili ka hartuar një plan-veprim konkret dhe së bashku me grupin operacional ndodhet në terren deri në hapjen e çdo aksi rrugor.
Gjatë gjithë ditës së sotme fadromat e bashkisë dhe automjetet e tjera të disponueshme kanë qenë në terren për të siguruar mbajtjen hapur të akseve rrugore, duke siguruar një mirëmenaxhim të situatës.
Reshjet e pandërprera të dëborës gjatë natës së kaluar, të shoqëruara më një erë të fuqishme ditën e sotme kanë izoluar sërish njësinë administrative të Iballës, ndonëse ky aks rrugor u hap nga bashkia në orët e vona të mbrëmjes së djeshme, ajo gjendet aktualisht e izoluar dhe banorët e kësaj zone janë besimplotë si cdo herë tjetër se bashkia dhe kryetari i saj Fran Tuci, do të bëjnë të pamundurën për të sfiduar vështirësitë dhe rrethanat atmosferike duke mundësuar në kohë rekord bërjen të qarkullueshme të këtij aksi rrugor.
Në orët e pasdites është mbledhur shtabi i emergjencave civile, kryesuar nga kryetari Tuci, i cili ka bërë një vlerësim të situatës së krijuar, si dhe ka dalë me masa konkrete, të cilat mundësojnë vijueshmërinë e mbajtjes në gatishmëri të plotë të strukturave operacionale të bashkisë, me qëllim përballimin me sukses të situatës së krijuar.
Përkundrejt temperaturave të ulëta, duhet theksuar se grupet e punës të kryesuara nga vetë kryetari fran Tuci kanë qëndruar non stop në terren, duke mbajtur kontakte të vazhdueshme me banorët e njësive administrative, duke ofruar kështu një mirëmenaxhim si asnjëherë tjetër më parë të situatave të ngjashme në këtë bashki.
Në këto momente, me ndëprerjen e reshjeve pritet të vijojë me intensitet puna për hapjen e aksit rrugor Iballë-Fushë Arrëz, ndonëse duhet nënvizuar se mbetet një nga segmentet më të vështira në qarkullimin rrugor shqiptar.
https://www.facebook.com/andiigjinaj/videos/2513165952033864/
https://www.facebook.com/andiigjinaj/videos/2513178458699280/
