Kryetari i Bashkisë Fushë-Arrëz, Z. Fran Tuci uron qytetarët me rastin e Vitit të Ri:
Qytetarë të dashur,
Nga thellësia e zemrës sime, uroj që viti 2019 të jetë nje vit plot me lumturi, shëndet dhe shpresë për të gjithë Ju.
Më lejoni të dërgoj një përshëndetje të ngrohtë për të gjithë banorët e bashkisë Fushë-Arrëz kudo ndodhen, brenda vendit dhe jashtë tij, Ju uroj të gjithëve një vit të mbarë me begati dhe shëndet në familjet e tyre!
Të nderuar Qytetarë !
Më lejoni t’ju kujtoj që viti 2018 ishte një vit i përmbushjes së mjaft premtimeve konkrete, një vit kuptimplotë dhe me arritje të konsiderueshme për zhvillimin e qytetit, sepse me punën tonë kemi transformuar bashkinë në orientimin dhe drejtimin e pandalshëm drejt zhvillimit.
Përveç investimeve në infrastrukturë, në rrugë, sheshe e objekte social-kulturore dhe arsimore, kemi punuar për turizimin dhe zhvillimin kulturor, por dhe për bujqësinë e pyjet. Kemi investuar në shkolla e kopshte, të cilat janë domëthënia e madhe e vizionit tonë për gjeneratat e ardhshme.
Qytetarët e mi të nderuar,
Ky vit që po troket do të jetë viti i ndryshimeve dhe arritjeve akoma më të mëdha, sepse ne do të rritim përpjekjet tona për të përmushur ëndrrat e të gjithëve Ju, dhe për të bërë një hap më të madh përpara në përmbushjen e plotë të vizionit tonë për zhvillimin ekonomik të bashkisë.
Le të mbledhim të gjithë diturinë dhe forcën tonë kolektive, sepse vetëm kështu mund të bëjmë që Fushë-Arrëzi të jetë akoma më i mirë: me shkolla më të mira, me kopshte dhe cerdhe akoma më të mira, me rrugë më të mirëmbajtuara. Një qytet i mirëqënies moderne, qytet i zhvillimit për një ekonomi më të mirë dhe me perspektivë të re për të gjithë shtrirjen territoriale të kësaj bashkie.
Unë besoj tek Ju, dhe bashkë me Ju do të çojmë para objektivin e transformimit të bashkisë sonë në një hapësirë atraktive dhe shpresëdhënëse.
Le të ecim përpara së bashku dhe të krijojmë të ardhmen tonë me besim dhe shpresë. Vetëm me pjesëmarrjen dhe bashkëpunimin Tuaj ne do të jemi në gjendje që ta kthejmë Fushë-Arrëzin në një shoqëri në të cilën të mund te jetohet dhe ku gjithçka ecën dhe ndryshon shumë shpejt, një qytet ku te gjithë të ndjehemi pjesë e tij, për ndërtimin e të ardhmes së të cilit punojmë të gjithë;
Më lejoni përsëri t’Ju falenderoj përzemërsisht për mbështetjen dhe bashkëpunimin Tuaj!
Dhe një herë Ju uroj të gjithëve që ky vit i Ri t’ju sjellë gëzim, mirëqënie dhe shëndet në familjet tuaja.
Faleminderit
Kryetari
Fran Tuci
