Në Kuvendin Kombëtar të PD-së, Lulzim Basha tha se PD-ja nuk do të vijë kurrë në pushtet mbi kufoma por tregoi mënyrat sesi do të rrëzohet Edi Rama. Basha tha se pavarësisht kërkesave të shumë prej të pranishmëve kërkojnë organizimin e protestave masive për rrëzimin e qeverisë, qoftë edhe me dhunë, PD-ja sipas tij nuk do të vijë kurrë në pushtet mbi kufoma por përmes zgjedhjeve.
”Sa më parë të largohet nga pushteti Edi Rama, aq më mirë do të jetë për Shqipërinë; sa më larg të jetë dita e largimit të tij, aq më zi do të jetë për Shqipërinë”, Basha tha se me Edi Ramën nuk ka zhvillim, nuk ka mirëqenie, nuk ka shtet, nuk ka Shqipëri.
Në fund, ai shprehu bindjen se Rama rrëzohet duke denoncuar krimet e tij përditë, duke diskredituar ministrat e tij injorantë dhe hajdutë përditë, e duke demaskuar dhe braktisur klientët e tij hajdutë përditë.
Pjesë nga fjalimi
Unë e di se ka prej jush që kërkojnë që Partia Demorkatike të organizojë protesta për rrëzimin e qeverisë, qoftë edhe me dhunë. Ka edhe në media dhe në publik zëra të fuqishëm që e propagandojnë këtë ide. Është absolutisht e drejtë kushtetuese dhe liria e ccdo kujtqë të protestojë kundër qeverisë.
Partia Demokratike mbështet dhe nxit çdo lloj proteste për mbrojtjen e të drejtave, lirive të njerëzve dhe për mbajtjen e qeverisë përgjegjëse. Është absolutisht detyrimi ynë t’i përkrahim, mbështesim dhe madje t’i prijmë këto protesta atëhere kur është e mundur. Këtë ne e kemi bërë dhe do ta bëjmë kundër keqeverisjes, krimin dhe korrupsionin. Por PD nuk do të vijë kurrë në pushtet mbi kufoma. PD nuk do të vijë kurrë në pushtet me mjet tjetër përveçse me zgjedhje. Demokratët nuk e duan pushtetin duke shkaktuar drama dhe kosto shoqërore, duke nxitur përçarjen e përplasje mes shqiptarësh.
Jeta dhe mirëqenia e çdo shqiptari është më e shtrenjtë se çdo karrike e tepsi. Ne nuk jemi burravecë që t’i përdorin shqiptarët e ndershëm e të pafajshëm si mish për top për të ardhur në pushtet. Kurajo është të punosh për ditë, çdo ditë, për të kërkuar llogari, drejtësi e ndryshim, për të bindur njerëzit për këtë ndryshim. Dua ta them edhe një herë siç e kam thënë me mijëra herë: sa më parë të largohet nga pushteti Edi Rama aq më mirë do jetë për Shqipërinë. Sa më larg të jetë dita e largimit të tij, aq më zi do të jetë për Shqipërinë. Me Edi Ramen nuk ka zhvillim, nuk ka mireqenie, nuk ka shtet, nuk ka Shqiperi!
Por unë jam i bindur se për të rrëzuar Edi Ramën nuk ka nevojë për dhunë. Edi Rama nuk rrëzohet nga pushteti duke e goditur një herë me top.
Edi Rama rrëzohet:
Duke i rezistuar atij përditë
Duke kundërshtuar përditë keqqeverisjen e tij
Duke protestuar për ditë
Duke ju bashkuar protestës së qytetarëve të Shkozës
Duke ju bashkuar protestës së qytetarëve të Unazës
Duke iu bashkuar protestës së qytetarëve për Teatrin
Duke iu bashkuar protestës së qytetarëve të Kukësit
Duke iu bashkuar protestës së qytetarëve të Himarës
Duke iu bashkuar protestës së studentëve
Duke iu bashkuar protestave të qytetarëve, biznesit të vogël, fermerëve, që po shpërthejnë ccdo ditë nën shembullin e kurajos së studentëve
Duke iu bashkuar çdo proteste, çdo ditë, kundër çdo padrejtësie
Rama rrëzohet:
Duke denoncuar krimet e tij përditë
Duke diskredituar ministrat e tij injorantë dhe hajdutë përditë
Duke demaskuar dhe braktisur klientët e tij hajdutë përditë.
