Kryetari i PBDKSH, Eduart Ndocaj, përmes një deklarate, ka dënuar ashpër dhunën e policisë mbi protestuesit e “Astirit”, të cilët prej më shumë se dy javësh janë në një reagim qytetar në mbrojtje të vjedhjes së pasurisë së tyre nga qeveria e Edi Ramës dhe falangat e krimit, do të shprehej Ndocaj në deklaratën e tij.
Përmes këtij qëndrimi, z.Ndocaj, apelon banorët e “Unazës së Re”, të cilët preken nga papërgjeshmëria e qeverisë dhe planeve ogurzeza të saj, të bëjnë rezistencë të fortë, pasi askush nuk ka të drejtë të cënojë pronën private të tyre, të cilën e kanë ndërtuar me mjaft mund dhe djersë, si dhe të përshkallëzojnë protestën e tyre, deri në garantimin e moscënimit të pronës së tyre.
Ja deklarata e plotë e kreut të PBDKSH, Eduart Ndocaj:
Të dashur banorë të zonës së “Unazës së Re”! Për ju janë momente decizive dhe përballë keni një grup kriminal të strukturuar, që maskohet me emrin qeverisje, i cili kërkon t’u vjedhë pronën tuaj private, të cilën ju e keni ndërtuar me aq shumë mund dhe djersë.
Protesta juaj e sotme dhe e disaditshme është mjaft dinjitoze dhe në të drejtën civile, pasi ju nuk po kërkoni asgjë më shumë, se sa mbrojtjen e pronës suaj private nga lukunia e hajdutëve të pasurive publike që kanë zaptuar këtë vend.
Dënoj ashpër dhunën e ushtruar ndaj protestuesve, si dhe i bëj thirrje policisë së shtetit të mos vërë dorë mbi protestuesit, duke u keqpërdorur me urdhëra politikë, pasi, qytetarët e asaj zonë, janë në një të drejtë themelore kushtetuese, duke mbrojtur pronën e tyre, ku për ne shqiptarët, ajo është e shenjtë.
Apeloj, banorët të bëjnë rezistencë, pasi kjo lukuni hajdutësh dhe të babëziturish, janë në një rrokullisje të shpejtë dhe për këta ka filluar numërimi mbrapsht. Asgjë dhe askush nuk mund ta ndalë forcën e qytetarëve, të cilët shohin dita-ditës se në pragun e tyre po u afrohet një e keqe e madhe, ndaj së cilës duhet reagim mbarëpopullor. Fundi i Edi Ramës është i pashmangshëm dhe ai shumë shpejt do të zërë faqet e para të gazetave për kërkim ndërkombëtar, ose për azil politik tek sivllezërit e tij Erdogani, Putini apo dhe Kim Jong-u.
Nisur nga ky kontekst politik, PBDKSH, mbështet protestën e këtyre banorëve dhe apelon qytetarët për mbështetje masive, pasi kjo e keqe e madhe me emrin “qeveri” është rrezik evident për cdo shtetas shqiptar.
