Shqipëria do të luajë sotndeshjen e fundit në Ligën e Kombeve përballë Skocisë. Një ndeshje që duhet fituar medoemos, nësë duam të shmangim rënien në divizionin e fundit, pra divizionin D, aty ku luajnë ekipe si Malta, Armenia etj.
Ndeshja e sotme do të jetë dhe një sfidë më vetë për Panuccin, i cili rrezikon shumë pasi deri më tani nuk ka bindur askënd me aftësitë e tij si trajner.
Numri një i stolit ka zgjedhur dhe titullarët që do të luajnë nga minuta e parë në Shkodër. Porta është kthyer në pronën e portierit Thomas Strakosha, i cili ka fituar betejën me Etrit Berishën. Mbrojtja gjen Veselin në krah të djathtë, i cili preferohet të mbyllë hapësirën e lënë bosh nga Hysaj i pezulluar, Xhimshiti dhe Mavraj në qendër, ndërsa majtas nga Binaku. Mesfusha gjen Memushajn dhe Xhakën, por emri i tretë është surprizë, Ergys Kaçe.
Lojtari i Panathinaikosit u thirr në emergjencë nga mungesa e Ylber Ramadanit dhe tashmë do të hidhet në fushë nga minuta e parë. E çuditshme zgjedhja e Panuccit! Nga krahu tjetër, në krahët e sulmit janë Uzuni dhe Grezda. Ky i fundit është rikuperuar në kohë dhe do të luajë nga minuta e parë. I vetëm në sulm është Bekim Balaj.
Formacioni i mundshëm i Shqipërisë: Strakosha; Veseli, Xhimshiti, Mavraj, Binaku; Kaçe, Xhaka, Memushaj; Uzuni, Grezda; Balaj. Tr. Christian Panucci. /CNA.al
