Miliona njerëz në mbarë botën janë duke u përgatitur për një nga festat më të mëdha, Vitin e Ri Hënor, i cili shënon hënën e parë të re të kalendarit hënor.
Këtë vit nis më 10 shkurt me Festivalin 15-ditor të pranverës dhe për të gjithë ata që nuk e njohin siç duhet apo kanë nevojë për një rifreskim të traditave të kësaj feste, po jua rikujtojmë.
Viti i Ri Hënor i Dragoit
Edhe pse tepër kompleks, kalendari kinez i zodiakut përshkruhet më së miri si një cikël 12-vjeçar i përfaqësuar nga 12 kafshë të ndryshme, në këtë renditje janë: Miu, Kau, Tigri, Lepuri, Dragoi, Gjarpri, Kali, Dhia, Majmuni, Gjeli, Qeni dhe Derri .
Shenja juaj personale e kafshës së zodiakut përcaktohet nga viti i lindjes, që do të thotë se viti 2024 do të mirëpresë shumë fëmijë dragonjë në botë. Të lindurit në 2025 do të jenë gjarpërinj, e kështu me radhë.
Ndjekësit besojnë se për çdo shenjë kineze të zodiakut, fati do të varet kryesisht nga pozicionet e Tai Sui – një emër yjor që mendohet se rrotullohen paralelisht dhe në drejtim të kundërt të Jupiterit.
Rituale që ndiqen gjatë këtyre ditëve:
Ndizni fishekzjarrë dhe vishni të kuqe
Përralla të panumërta popullore i bashkëngjiten Vitit të Ri Hënor, por miti i “Nian” spikat si një nga më argëtuesit. Legjenda thotë se Nian ishte një bishë e egër nënujore me dhëmbë dhe brirë të mprehtë. Çdo natë të Vitit të Ri Hënor, ajo zvarritej në tokë dhe sulmonte një fshat. Në një rast të tillë, ndërsa fshatarët nxituan të fshiheshin, një plak misterioz u shfaq dhe këmbënguli të rrinte përreth, pavarësisht se ishte paralajmëruar për dënimin e afërt. Për habinë e fshatarëve, plaku dhe fshati mbijetuan plotësisht të padëmtuar.
Burri pretendoi se e kishte trembur Nian duke varur pankarta të kuqe në derë, duke ndezur fishekzjarrë dhe duke veshur rroba të kuqe. Kjo është arsyeja pse veshja e ngjyrës së zjarrtë, së bashku me varjen e banderolave të kuqe dhe ndezjen e fishekzjarrëve, janë tradita të Vitit të Ri Hënor.
Përgatitja
Përveç argëtimit, Viti i Ri Hënor mund të jetë shumë punë për disa. Festimet shpesh zgjasin 15 ditë, ndonjëherë edhe më shumë me detyra dhe aktivitete të ndryshme që zhvillohen gjatë asaj periudhe. Gjithçka fillon rreth një javë përpara vitit të ri. Ëmbëlsira dhe pudingu festiv bëhen në ditën e 24 të muajit të fundit hënor (3 shkurt 2024). Ato janë ushqime të cilat mendohet të jenë fatsjellëse.
Sipas traditës, një pastrim i madh duhet të kryhet në shtëpi në ditën e 28 të muajit të fundit hënor, i cili bie më 7 shkurt të këtij viti. Qëllimi është të çlironi shtëpinë nga çdo fat i keq që është grumbulluar gjatë vitit të kaluar. Dhe mos pastroni më asgjë deri më 12 shkurt, përndryshe po fshini e lani gjithë atë fat të mirë që erdhi në fillim të vitit të ri.
Nata e Vitit të Ri Hënor: Festa e madhe
Një darkë e madhe e bashkimit familjar zakonisht mbahet në natën e Vitit të Ri Hënor, i cili bie më 9 shkurt të këtij viti. Menuja është zgjedhur me kujdes për të përfshirë pjatat që lidhen me fatin, si peshk (fjala kineze për të tingëllon si “tepricë”), puding (simbolizon përparimin) dhe ushqime që duken si shufra ari. Në Kinë, ushqimet që shërbehen në këto darka klasike ndryshojnë nga veriu në jug. Për shembull, kinezët veriorë kanë tendencë të kenë petë ndërsa kinezët e jugut nuk mund të jetojnë pa oriz të zier në avull. Ditët e para të Vitit të Ri Hënor, veçanërisht dy ditët e para, janë shpesh një provë e qëndrueshmërisë, oreksit dhe aftësive sociale, pasi shumë njerëz duhet të udhëtojnë dhe të vizitojnë familjen e ngushtë, të afërmit dhe miqtë e tjerë.
Dita 3: Vizitoni një tempull
Dita e tretë e Vitit të Ri Hënor (e cila bie më 12 shkurt 2024) quhet “chi kou/cek hau”.Njerëzit këtë ditë duhet të vizitojnë një tempull ku të shprehin lutjet dhe me besimin që të realizohen dëshirat.
Dita 7: Ditëlindja e popullit
Dita e shtatë e Vitit të Ri Hënor (16 shkurt 2024) thuhet se është kur perëndesha nënë kineze, Nuëa, krijoi njerëzimin ose ndryshe quhet ditëlindja e popullit.
Dita 15: Festa e Fenerëve
Pika kryesore e gjithë Festivalit të Pranverës, Festivali i Fenerëve ndodh në ditën e 15-të dhe të fundit (24 shkurt 2024). I quajtur “Yuan Xiao Jie” në gjuhën kineze, konsiderohet si përfundimi i përsosur i përgatitjeve dhe festimeve të Vitit të Ri Hënor prej javësh. Festivali feston hënën e parë të plotë të vitit, prandaj emri (Yuan do të thotë fillim. Xiao do të thotë natë). Ai simbolizon fillimin e stinës së pranverës. Në këtë ditë, njerëzit ndezin fenerë për të simbolizuar largimin e errësirës dhe për të sjellë shpresë për vitin e ardhshëm. Në shoqërinë e lashtë kineze, ishte e vetmja ditë kur vajzat e reja lejoheshin të dilnin për të admiruar fenerët dhe për të takuar djemtë. Si rezultat, ajo është quajtur edhe Dita e Shën Valentinit në Kinë. Në ditët e sotme, qytetet në mbarë botën ende mbajnë ekspozita masive me fenerë dhe panaire në ditën e fundit të festivalit.
