Nënryetarja e Partisë Demokratike Jorida Tabaku beson se pas Kuvendit të 18 demokratët do të jenë së bashku, pavarësisht se mendojnë ndryshe. Në një intervistë në Top Neës, zonja Tabaku ftoi delegatët të shorehin çdo mendim kritik në Kuvendin e 18 Dhjetorit. “Për PD është vlerë që ka mendime të ndryshme. Gjyshi im ka qenë i internuar në Savër të Kushnjës që unë të kem mendim ndryshe. Ajo që nuk e bëj vetë dhe nuk e pranoj nga të tjerët është gjuha e akuzave dhe e linçimit, por mendimi ndryshe është vlerë e jona, që nga themelimi i partisë. Kështu qe kushdo që ka një mendim ndryshe, ka hapësirë për ta thënë atë në Kuvendin e PD në 18 Dhjetor. Jam e sigurtë që PD është një forcë e madhe e politke dhe e vetmja forcë që mund të ndryshojë Shqipërinë”
Në përgjigje të pyetjes çfarë ndryshon mes 11 dhe 18 Dhjetorit, Jorida Tabaku vendosi theksin tek legjitimiteti i Kuvendit Kombëtar të PD. “Në 11 Dhjetor zhvillohet një aktivitet i zotit Berisha me mbështetës të tij. Askush nuk e koho që ai ka mbështetës, anëtarë të PD. Në datën 18 është Kuvend zyrtar, që ka fuqinë, legjitimitetin, bazuar mbi Statutin, që do të marrë vendime, që do të mbledhë bashkë të gjithë demokratët. Një thirrje për t’u bërë bashkë në datën 18. Për datën 18 ka një konfirmim të jashtëzakonshëm. Do të jetë një Kuvend shumë i rëndësishëm i PD sepse do të përcaktojë strategjinë, rrugën, vizionin për vitet në vijim”, tha zonja Tabaku.
E vetëdijshme se situata ku po kalon PD është më e vështira e 31 viteve që nga themelimi, Jorida Tabaku beson se demokratët do ta kalojnë këtë sfidë për hir të së ardhmes së PD dhe Shqipërisë. “Besoj që vështirësitë e kësaj situate do të kalojnë dy javët në vijim, që janë shumë të rëndësishme për politikën shqiptare në përgjithësi dhe, në veçanti, për PD. Jam e sigurtë që ekziston një brez i ri i jashtëzakonshëm politikanësh që nuk kanë frikë të ecin përpara. Besoj që PD, megjithë vështirësitë, është në këmbë dhe do të jetë më e fortë. Luftën ne e kemi me Edi Ramën. Atë kemi kemi kundërshtarin tonë, nuk kemi askënd brenda PD”. – u shpreh Jorida Tabaku.
