Sot nis viti i ri akademik 2021-2022! Pas më shumë se një viti mësimi online, studentët dhe pedagogët do të rikthehen në auditore, duke paraqitur certifikatën e vaksinës ose një vërtetim që kanë kryer të paktën një dozë, ose duke paraqitur një test PCR negativ. Nëse studenti nuk paraqet asnjëherën nga kushtet e vendosura, nuk do lejohet të futet brenda auditorit.
Rektori i Universiteti të Tiranës, Artan Hoxha, pohoi tre ditë më parë se mbi 50% e studentëve janë vaksinuar e se pikat e vaksinimit në fakultete do të vijojnë që të funksionojnë për të gjithë ata studentë që nuk e kanë të mundur që të vaksinohen.
Nga dita e sotme, janë parashikuar të stacionohen punonjës sigurie me qëllim për të mos lejuar asnjë student “të pabindur” i cili nuk është i vaksinuar apo me test PCR të marrë pjesë në leksione a seminare. Bashkë me punonjësit e sigurisë është ngarkuar edhe struktura administrative të rakordojë hyrje-daljet në fakultete.
Ministrja e Arsimit, Evis Kushi, ka ndarë një mesazh urimi për të gjithë studentët duke iu kërkua që ende të vijojnë të vaksinohen pasi janë anëtarë të një komuniteti e në këtë mënyrë respektojnë veten dhe të tjerët.
“Më lejoni edhe një herë që të ftoj të vaksinohet secili prej jush që nuk ka pasur mundësi deri më tani. Sepse ne besojmë që universiteti nuk formon vetëm profesionistë apo shkencëtarë të fushave të ndryshme, por formon qytetarët e një shoqërie, të cilët mësojnë të jenë anëtarë të një komuniteti, duke respektuar të drejtat e njëri-tjetrit. Dhe kjo është e pamundur të realizohet duke qëndruar përpara ekranit të një kompjuteri apo telefoni celular, por vetëm nëpërmjet ndërveprimit me pedagogët tuaj, kolegët dhe duke u parë sy me sy me njëri-tjetrin”.
Ishte parashikuar që viti i ri akademik të niste më 11 tetor, por me kërkesë të Konferencës së Rektorëve, u përcaktua data 18 tetor, dhe kjo me qëllim vaksinimin masiv të studentëve.
