Marinela Ziu
Drejtuese, Zyra Antikorrupsion në Partinë Demokratike
Vetëm pak ditë më parë, Banka Botërore dhe BERZH renditën Shqipërinë të dytën në botë për nivelin e korrupsionit, e ndërsa sot, përgjegjësi kryesor i 8 miliardë eurove shpërdorim dhe vjedhje të parave publike sipas KLSH, doli dhe bëri show-un e radhës duke adresuar Kryebashkiakët si përgjegjës të kulturës së shtet-hajnisë, të krijuar dhe mbështetur nga vetë Ai.
Faktet janë kokforta dhe situata me prokurimet publike është edhe më e rëndë nga sa prezantoi sot Kryeministri, dhe kjo jo nga Bashkitë, të cilat zotërojnë vetëm 20% të fondeve të prokuruara, por veçanërisht nga Qeverisja Qendrore dhe institucionet në varësi direkte të tij.
Bazuar në analizën e të dhënave zyrtare dhe publike të Agjencisë së Prokurimit Publik, rezulton se në vitin 2020 janë zhvilluar 5307 procedura prokurimi, me vlerë 1.1 miliardë euro, i cili si një vit paraelektoral, reflekton një rritje të vlerës së prokuruar me 447 milionë euro më shumë se në vitin 2019 si dhe një rritje me 750 milionë euro më shumë krahasuar me vitin 2014.
Theksoj se, vetëm pak para zgjedhjeve, në muajt nëntor dhe dhjetor 2020, është hapur gara për zhvillimin e 505 milionë eurove prokurime publike, me të cilat, u ekzekutua një pjesë e masakrës elektorale të zgjedhjeve të 25 prillit.
Në vitin 2020, 41% e procedurave janë me një operator në garë pra pa garë, ndërkohe kjo situatë është edhe më e rëndë në institucionet qendrore, ku 50% ose 1 në 2 procedura prokurimi janë me një operator në garë pra pa garë.
Vlera e kontratës është nga 95% – 100% e barabartë me vlerën e fondit limit në 57.8% të procedurave të prokurimit, e cila konsiston në 744 milionë euro ose 68.4% të vlerës total të prokuruar.
Nqs do të zbatohej Ligji “Për Prokurimin Publik” në 1357 procedura me garë ose 25.5% e procedurave total dhe të kualifikohej fitues oferta më e ulët, e pranuar nga vetë institucionet si kriter për kualifikimin e operatorit fitues, ndërkohë që është kualifikuar fituese oferta më e lartë, buxhetit të shtetit do ti kursehej 54 milionë euro ose 5% e vlerës total të prokuruar, e cila konsiston në një rritje me 15.5 milionë euro më shumë krahasuar me vitin 2019.
Si vit elektoral, situata është edhe më dramatike në vitin 2021, ku përfituesit kryesorë të parave publike, pa garë, pa transparencë dhe me kritere teresisht të paracaktuara, janë personat me rekorde të rënda kriminale, me të cilët Kryeministri mban dhe ndan pushtetin, faktuar me prova dhe dokumentacion zyrtar nga Partia Demokratike edhe ditët e fundit.
E vetmja zgjidhje për kthimin e situatës në normalitet është dhënia fund e kulturës së pandërshkueshmërisë, vënia para përgjegjësisë penale e çdo shkelësi të ligjit dhe rikthimi në buxhetin e shtetit të çdo qindarke të vjedhur… e kjo, duke filluar nga vetë Kryeministri e Uriahip-i i Bashkisë Tiranë..
