Të dashur miqtë e mi!
Shqipëria po shkon drejt zgjedhjeve të 25 prillit, e zhytur në një situatë nga më të vështirat e këtij tranzicioni të tejzgjatur, pasi ka humbur dhe ajo pak liri që fituam. Shqipëtarët janë tretur rrugëve të botës në kërkim të mundësive të jetesës, pasi vendi i tyre nuk ua mundëson.
Së bashku, kemi rastin që me 25 prill, t’i japim zë Atdheut tonë të dashur, duke e peshuar votën, dhe në emër të fëmijëve tanë, të reflektojmë me përgjegjësi historike. Qeverisja e “rilindjes”, më shumë se keqqeverisje, rezultoi të ishte e dëmshme për interesat kombëtare. Pas 7 viteve në drejtim, Edi Rama, me karagjozllëkun e tij dhe mungesën e vizionit, na largoi më shumë me Evropnë dhe e degdisi ëndrrën shqiptare të integrimit në sqetullat e Erdoganit.
Le të mos e konsiderojmë 25 prillin, si ditën kur largojmë një palë qeverisëse me një palë tjetër, por si ditën, kur secili prej nesh, peshon fatet e udhëkryqit në të cilin ndodhemi! Shqipëria e ‘rilindjes” është bërë regjim erdoganist në miniaturë, pasi Rama ka shfaqur haptazi admirimin dhe orientimin e tij për liderin turk Erdogan, kur ndërkohë, këtë të fundit e vëzhgon e tërë bota demokratike për sjelljet dhe qëndrimet e tij ndaj lirive dhe të drejtave të njeriut, si dhe për aspiratën otomaniste që ai ka shpallur.
Bashkërisht, mundemi që me 25 prill, të marrim fatet e Shqipërisë, duke rrëzuar nga froni, të gjithë ata që guxuan të trajtojnë shqiptarët si mall elektoral, por asnjëherë si qytetarë të devotshëm. Le ti japim fund, regjimit të zullumqarëve të “rilindjes” dhe të hapim një kapitull të ri, të shpresës dhe të dinjitetit njerëzor.
E. N