“Java e integritetit”, që përmes aktiviteteve sensibilizuese mobilizoi zyrat e integrimit evropian në disa bashki të vendit, duke promovuar qasjen e shoqërisë sonë ndaj vlerave përbashkuese me familjen evropiane, mbylli siparin e saj dhe në bashkinë Vau-Dejës, ku përmes një aktiviteti domëthënës, me këshillin bashkiak, si dhe individë të jetës publike, trajtuan temën: “Korrupsioni si dukuri shoqërore“, e cila erdhi e trajtuar në këndvështrimin e përfaqësuesve të institucioneve dhe kontributit konkret në parandalimin e këij fenomeni.
I organizuar me detaje, ky aktivitet mori vëmendjen e duhur dhe nga mediat lokale, të cilat përvecse pasqyruan veprimtarinë, evidentuan rolin e drejtueses së zyrës së integrimit evropian pranë kësaj bashkie, znj. Entela Kolaj, në tematizimin e cështjeve të tilla, të cilat në optikën e realitetit shqiptar, shpeshherë janë zbehur dhe nuk kanë marrë seriozitetin e duhur, duke krijuar një simbiozë absurde me perceptimin mbi korrupsionin dhe format e shfaqjes së tij.
Kryetari bashkisë, Mark Babani, nënvizoi punën e bërë nga zyra e integrimit, si dhe listoi një masash të ndërrmarra nga bashkia në kuadër të parandalimit të fenomeneve korruptive.
Bashkëbiseduesit, u fokusuan në nevojën e madhe për sensibilizimin e shoqërisë, si dhe nënvizuan nevojën për krijimin e mekanizmave të ndëshkueshmërisë ndaj fenomenit të korrupsionit.
” Ne në asnjë mënyrë nuk mund të lejojmë që korrupsioni të vazhdojë të gërryejë sisteme, dhe t’i çojë ato në shkatërrim. Ne duhet të jemi të kujdesshëm dhe të gatshëm që të mos lejojmë që ajo të përhapet më tej, duke shkatërruar kështu shoqërinë në të cilën jetojmë. Punoni me integritet! Thuaj Jo korrupsionit”.
Me këtë ekstrakt, që shenjon qëllimin e aktivitetit , i cili u realizua cilësisht dhe me një zell të jashtëzakonshëm nga drejtuesja e zyrës, znj. Entela Kolaj, dhe e mbështetur nga bashkia, u dha mesazhi se qytetarët duan të asociohen me sundimin e ligjit, me punën e ndershme dhe dinjitetin profesional.
