Nga Jorida TABAKU
Ditën e djeshme mazhoranca votoi amendimin për ligjin e Institutit të Studimeve Krimeve Kunder Komunizmit (ISKK).
Ky institut u krijua gjatë qeverisjes së PD për ti dhënë një qasje shkencore asaj çndodhi për 50 vjet nën diktaturë. Natyrisht që ajo që ndodhi gjatë diktaturës zanafillën e pati që në kohën e luftës së dytë botërore. Skenat e terrorit që komunistët kryen ndaj kundërshtarëve ideologjikë shqiptarë ishin te frikshme.
Mirëpo mazhoranca e majtë që ka nje qasje shumë romantike ndaj të shkuarës komuniste sidomos diktatoriale, ditën e djeshme i mohoi shqiptarëve të drejtën për të njohur historinë siç ka ndodhur nga 1941 e në vazhdim. Ajo vendosi që të fshijë studimin e periudhës 1941-1945 të krimeve të komunistëve ndaj shqiptarëve.
Kështu, ky institut nuk mund të studiojë dhe të botojë vepra për masakrën e nëntorit 1944 që komunistët kryen në Tiranë me hotel Bristol apo dhe masakrat ne Tropojë të tetorit 1944.
Fshehja e këtyre krimeve që ishin parërendëse e asaj që do të ndodhte më tej në Shqipëri janë tmerruese. Ne ende vuajmë sot nga një amnezi kolektive për të djeshmen dhe fatkeqësisht jemi një vend kandidat në BE që ende luftojmë për të fshehur krimet e regjimit komunist.
Të ndalosh të drejtën e një akademiku apo kujtdo tjetër të studiojë periudhën e krijimit dhe formësimit të komunizmit në Shqipëri është krim ndaj dijes dhe mbi të gjitha shqiptarëve. Beteja e atyre që u kalbën në burgje apo qe u vranë nga regjimi komunist nuk do të shkojë kot.
Këto ndryshime janë qesharake dhe tentojnë të fshehin të vërtetat apo të inskenojnë një debat shterp. Por sido që të jetë angazhimi ynë është që të rikthejmë ligjin siç qe dhe mbi të gjitha të dënojmë pro-komunizmin njësoj siç dënojmë anti-semitizmin.
Për të mos harruar!
