Prokuroria e Përgjithshme nis verifikimet për kryebashkiakun e zgjedhur të Shkodrës Valdrin Pjetri.
Kjo vjen pak ditë pasi PD depozitoi kërkesë në organin e akuzës që të bëheshin verifikime për pastërtinë e figurës së kryebashkiakut të dalë nga zgjedhjet e 30 qershorit. PD pretendon se Pjetri nuk mund të kandidonte për këtë post pasi ka qenë i ndaluar dhe dëbuar në Itali.
Kërkesa e PD i ka kaluar sektorit të Dekriminalizimit në Prokurorinë e Përgjithshme, për kompetence. Sektori do kryeje verifikimet perkatese dhe do dale me nje vendim.
Nje burim zyrtar ne Prokurorine e Pergjithshme konfirmoi lajmin për “Panorama.”
DENONCIMI I PD
Ditën e premte, 2 gusht, përmes një kërkese të firmosur nga Sekretari i Përgjithshëm, Gazment Bardhi, PD i kërkoi Prokurorisë së Përgjithshme të verifikojë figurën e Valdrin Pjetrit, pasi sic thuhej ne kerkese, ekzistojnë të dhëna, indicie dhe dëshmi publike se socialisti nuk mund të ushtrojë funksion publik për shkak te ligjit të dekriminalizimit.
“Në vitin 2001-2002, Valdrin Pjetri ka qenë i arrestuar/ndaluar në Itali (ka jetuar në Firence, Itali) dhe, më pas, ndaj tij është marrë masa e dëbimit nga autoritetet përgjegjëse italiane. Nga verifikimi i të dhënave të sistemit TIMS rezulton se shtetasi Valdrin Pjetri nga periudha 2002 – 23.03.2010 nuk ka udhëtuar në asnjë rast të vetëm në drejtim të Italisë, çka përbën një indicie për saktësinë e të dhënave të bëra publike më parë”, thuhet ndër të tjera në letrën e Bardhit.
Nëse këto të dhëna publike verifikohen pa vonesë nga Prokuroria, thekson PD, kjo do të thotë se Valdrin Pjetri nuk mund ta marrë detyrën e Kryetarit të Bashkisë së Shkodrës.
