Ministri i Brendshëm i Italisë, Mateo Salvini ka zbuluar sot se ka zhvilluar një telefonatë me Presidentin Meta në lidhje me krizën aktuale politike në Shqipëri. Në një video të postuar në Facebook Salvini flet për aktivitetet e tij ditore ku ndër të tjera përmend edhe telefonatën me Metën.
“Kam dëgjuar edhe presidentin e Shqipërisë Ilir Meta, pasi të dielën Shqipëria rrezikon shumë, sepse është një përplasje që mund të shkojë në një përplasje civile, siç është parë edhe në javët e fundit. Janë duke u mbajtur zgjedhje vendore nga ana e kryeministrit, të cilat janë anuluar nga presidenti i Republikës. Janë tërhequr partitë e opozitës dhe në to merr pjesë vetëm Partia Socialiste që është në qeveri dhe jam duke kërkuar që të komunikoj me të gjitha palët për të evituar një përplasje sepse Shqipëria është partnere kulturore, ekonomike, komerciale me Italianë. Por jo vetëm, duhet të kujtojmë njerëzit që emigrojnë dhe këtu duhet që të kujtojmë skenat e viteve ’90 dhe nuk do doja që të ktheheshin, pasi kemi mjaft probleme dhe nuk do donim që të shkonim në fronte të tjera”– ka thënë Salvini në një video live nga zyra e tij.
Kjo hera e parë që një nga liderët politikë nga vendet e BE zbulon komunikime me Presidentin Meta në lidhje me krizën politike në Shqipëri. Mateo Salvini gjithashtu ka mbështetur edhe hapjen e negociatave të Shqipërisë me BE pas publikimit të raportit të Komisionit Europian.
Ndër të tjera në video mesazhin e tij ai foli për çështjet e emigracionit që po trajton tani në Itali. Në përshkrimin e videos ai shkruan: “Emigracioni nuk mund të menaxhohet nga anijet e jashtëligjshme: ne jemi të gatshëm të bllokojmë çdo lloj paligjshmërie. Kush bën një gabim, paguan. P.S. Evropa? Mungon, si gjithmonë”. /Opinion.al
