Kandidati për kryetar të bashkisë Lezhë, Eduart Ndocaj, përmes një postimi në facebook, me rastin e festës së “Shën Andonit” të Padovës, ose siç njihet ndryshe nga besimtarët si festa e “Shna Ndout”, ka adresuar një mesazh urimi, duke u lutur që: zoti dhe Shna Ndou t’i ndihmojnë shqiptarët në këto momente të vështira, si dhe të ndriçojë mendjet e atyre që po ndjellin ndarje dhe përçarje ndër shqiptarë, duke luftuar për karriget e tyre.
Ish-deputeti “kaubojs”, këtë urim e bëri gjatë pelegrinazhit të tij në Kishën e “Shna Ndout” në Laç, ku së bashku me bashkëshorten e tij, morën pjesë në lutjet dhe në ritet e tjera për nder të kësaj feste që i atribuohet shenjtit bamirës të Shën Andonit të Padovës.
Ja mesazhi i plotë i kandidatit Eduart Ndocaj:
Të nderuar shqiptarë kudo ndodheni!
Të dashur bashkëqytetarët e mi lezhianë!
Me rastin e kësaj feste, uroj çdonjërin prej jush, për më shumë begati dhe mirëqënie në familjet tuaja!
Lutem, para Shenjtit Shna Ndue, si shenjti i mrekullive dhe bamirësive të pafundme, që të sjellë paqen shpirtërore kaq shumë të shumëdëshiruar ndër shqiptarë, të cilët po vuajnë tekat dhe kapriçiot e disa drejtuesve të papërgjegjshëm, duke krijuar një realitet dëshpërues për fatet dhe perspektivën tonë europiane.
Uroj për bashkëqytetarët e mi lezhianë kthjelltësi dhe vlerësim racional të situatës aktuale zgjedhore, duke zhvlerësuar përfaqësuesit e djallit që vijnë të maskuar me petkun e përfaqësuesve të pushtetit, dhe në emër të pangopësisë së tyre duan t’ju mashtrojnë për të marrë fatet e menaxhimit të pronave dhe ta pasurive publike të Lezhës.
Lutem që zoti të ketë dashamirësinë për të ndriçuar mendjet e votuesve lezhianë që të mos joshen nga djalli që vërtitet nëpër Lezhë, duke mashtruar dhe duke gënjyer me premtime sa qesharake, aq dhe të pabesueshme.
Ndeza disa qirinj, si lutje për të na mbajtur larg së keqes që kërcënon vlerat e qytetarisë lezhiane.
Lutja ime e fundit shkon për rivalin tim Pjerin Ndreu, që rruga e tij të kthehet në gjirin e familjes së tij, pasi vetëm ashtu do të mund ta kuptojë se çdo të thotë të sulmosh tjetrin me familje, duke u përpjekur të cënojë parimet dhe vlerat bazë të institucionit të shenjtë të familjes..
Familja për mua është e shenjtë dhe këtë duhet ta mësojë çdo njeri që përpiqet të më cënojë.
Eduart Ndocaj
