Presidenti Ilir Meta njoftoi pasditen e djeshme rrëzimin e dekretit që përcaktonte 30 qershorin si datën e zgjedhjeve vendore.
Vendimi i Metës, pak minuta para nisjes së protestës së opozitës, është konsideruar nul në aspektin ligjor nga kryeministri Edi Rama. Në këtë kuadër, socialistët e drejtuar nga Rama nuk do të njohin dekretin që rrëzon 30 qershorin si datë për zgjedhjet.
Prej mbrëmjes së djeshme, Rama ka nisur konsultimet, madje mësohet se ka mandatuar Taulant Ballën dhe Engjëll Agaçin për të kontaktuar jurist dhe konstitucionalistë dhe gjetjen e zgjidhjeve.
Por duket se hapi i parë, pasi Presidenti Meta apo institucioni i tij, të sqarojë arsyet mbi këtë vendim, do të jetë kalimi i dekretit në Kuvend.
Burime nga qeveria bëjnë të ditur se dekreti do të konsiderohet nul, me argumentin se Presidenti e ka konsumuar njëherë të drejtën kushtetuese për caktimin e datës së zgjedhjeve. Në këtë kuadër, socialistët e Ramës do të luajnë qoftë në aspektin politik, ashtu edhe juridik, duke i qëndruar idesë se Presidenti e ka caktuar njëherë datën për zhvillimin e zgjedhjeve.
“Nuk ka pasur asnjë konsultim me partitë politike, ka pasur vetëm takime me opozitën, ndërsa mazhorancës nuk i është kërkuar asnjë mendim për dakordësi. Në kushte të tilla është një vendim i njëanshëm, i pabazuar në Kushtetutë dhe që del jashtë çdo kompetence të Kreut të Shtetit, i cili me dekretin e mëparshëm ka konsumuar të drejtën për caktimin e datës së zgjedhjeve”, shprehen burime qeveritare.
Ndërkohë Edi Rama mësohet se nesër nis një udhëtim drejt Brukselit, ndërsa në Tiranë të besuarit e tij do të vijojnë kontaktet dhe konsultimet.
Situata bëhet më komplekse pot ë kihet parasysh mungesa e Gjykatës Kushtetuese, ngritja e së cilës është tërhequr zvarrë nga vetë mazhoranca, që ndjehej komode me faktin që askush nuk mund të ankimonte vendime apo ligje qofshin të qeverisë ashtu edhe të Parlamentit.
Në fakt mungesa e kësaj gjykate sot i është kthyer në bumerang vetë mazhorancës dhe kryeministrit Rama, që edhe në rastin më të mirë, atë të sigurimit të votave për shkarkimin e Presidentit, e ka të qartë se vendimi do t’i mbetet në sirtar deri në funksionimin e Kushtetueses. /Boldnews.al/
