Kreu i Partisë Lëvizja e Legalitetit, Shpëtim Axhami, ka reaguar lidhur me vendimin e fundit në Kuvend për mos heqjen e mandatit të deputetes Belinda Balluku.
Në një qëndrim publik, Axhami thekson se vendimi i deputetëve të Partisë Socialiste të Shqipërisë për të votuar kundër heqjes së mandatit të Ballukut përbën një sinjal negativ për funksionimin e shtetit të së drejtës dhe për procesin e integrimit europian të vendit.
Sipas tij, një klasë politike e përfshirë në korrupsion nuk mund të udhëheqë një luftë reale kundër korrupsionit. Ai kërkon heqjen e çdo forme imuniteti për politikanët dhe nisjen e një procesi vettingu për të gjithë zyrtarët e lartë shtetërorë.
Axhami thekson se vetëm një drejtësi e barabartë për të gjithë mund të rikthejë besimin e qytetarëve dhe të garantojë një rrugë të qartë drejt një Shqipërie më të drejtë dhe më pranë standardeve europiane.
Postimi i plotë i Shpëtim Axhamit
“Çdo politikan apo qeveritar i lartë duhet të zhvishet nga çdo lloj imuniteti dhe sa më parë të nisë vettingu për secilin prej tyre.
Një klasë politike e vet-korruptuar nuk mund të luftojë korrupsionin!
Votimi unanim i deputetëve të Partia Socialiste e Shqipërisë, për mos heqjen e mandatit të deputetes Balluku, përbën një sinjal negativ për funksionimin e shtetit të së drejtës dhe e largon Shqipërinë nga standardet që kërkon procesi i integrimit europian. Ky vendim bie ndesh edhe me deklaratat e vazhdueshme për mbështetjen e Reforma në Drejtësi në Shqipëri dhe për garantimin e një drejtësie të pavarur.
Është e qartë se një klasë politike e përfshirë në korrupsion nuk mund të japë dritën jeshile për luftën reale kundër korrupsionit. Nëse një zyrtar publik është i bindur për pastërtinë dhe integritetin e tij, ai nuk duhet të ketë frikë nga heqja e mandatit dhe nga përballja me drejtësinë.
Për këtë arsye, Partia Lëvizja e Legalitetit kërkon miratimin sa më parë të një ligji për vettingun e politikanëve, që të përfshijë deputetët, anëtarët e qeverisë dhe çdo funksionar të lartë shtetëror, si edhe heqjen e çdo forme imuniteti politik, duke i lënë drejtësisë dorë të lirë të veprojë. Vetëm një drejtësi e barabartë për të gjithë mund të rikthejë besimin e qytetarëve dhe të hapë rrugën për një Shqipëri të drejtë dhe europiane.”
