Specialistët për Hetimin e Krimeve në Komisariatin e Policisë Gjirokastër kanë referuar materialet në Prokurori, ku ka nisur procedimi penal për veprat penale “Shkelja e rregullave të mbrojtjes në punë” dhe “Shpërdorimi i detyrës” ndaj dy shtetaseve: Doriana Demo, 50 vjeçe, banuese në Gjirokastër, me detyrë drejtoreshë e Shtëpisë së të Moshuarëve në këtë qytet, si dhe Dh. Zh., 52 vjeçe, banuese në Gjirokastër, me detyrë kryekujdestare në këtë institucion.
Sipas njoftimit të policisë, veprimet procedurale janë ndërmarrë pas hetimeve për ngjarjen e ndodhur më 4 mars 2026 në Shtëpinë e të Moshuarëve në Gjirokastër, ku fillimisht dyshohej se një e moshuar kishte rënë aksidentalisht nga tarraca e godinës.
Nga hetimet rezultoi se shtetasja Sh. Z., 72 vjeçe, ishte vetëhedhur nga tarraca, ndërsa gjatë transportimit për në Spitalin e Traumës ajo ka humbur jetën.
Në vijim të veprimeve hetimore për këtë rast, policia ka referuar materialet në Prokurori edhe për shtetasin M. H., 37 vjeç, banues në Gjirokastër, me detyrë infermier në Spitalin Rajonal Gjirokastër, pasi dyshohet se nuk ka njoftuar organet ligjzbatuese për faktin se 72-vjeçarja kishte humbur jetën, edhe pse kishte dijeni se për rastin kishin nisur hetimet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
