Duke iu përgjigjur pyetjeve dhe komenteve të qytetarëve mbështetës në Foltoren e radhës të mbajtur në Krujë mbrëmjen e sotme (17 shkurt), kryetari i PD-së, Sali Berisha tha se kjo është beteja finale me regjimin, madje edhe nëse do duhet, edhe “me bukë me vete” në shesh deri në rrëzimin e këtij regjimi.
Berisha akuzoi kryeministrin Edi Rama se po mbron me çdo kusht ministrat e tij të korruptuar, duke ndërmarrë edhe nismën e ndryshimeve ligjore, por paralajmëroi se “me ligj dhe pa ligj ai nuk shpëton dot”.
“Ka 3 muaj mban peng shqiptarët për të mbrojtur ministrat e tij të korruptuar. Po bën gjithçka për t’u mbrojtur dhe shpëtuar. Por nuk shpëton ky, as me ligje dhe as pa ligje”, u shpreh lideri i opozitës.
Berisha nënvizoi se beteja do shkonte deri në fund, pasi ishte finalja para fitores së opozitës, madje edhe nëse do duhej të qëndrohej në shesh pa lëvizur dhe me “bukë me vete”.
“Do vazhdojmë betejën tonë deri në fitore. E thatë ju, edhe me bukë me vete…! Edhe aty do shkojmë, po, deri në rrëzimin e regjimit. Kjo është beteja finale dhe ne do ta fitojmë këtë, absolutisht”, deklaroi ai.
Berisha akuzoi edhe skandalet e qeverisë me vjedhjen e miliona eurove nëpërmjet tenderëve, sikurse afera e AKSHI-t apo të zv/kryeministres së pandehur nga SPAK dhe e pezulluar nga GJKKO, Belinda Balluku.
Berisha theksoi se shqiptarët e sëmurë vuajnë spitaleve pa ilaçe dhe pa mundësi kimioterapie, kurse qeveritarët bëjnë miliona dhe vjedhin qytetarët.
