Një reagim zyrtar i familjes së Selin Bollatit ka ndezur diskutime të forta rreth asaj që po ndodh brenda shtëpisë së Big Brother VIP Albania. Përmes një letre drejtuar Top Channel dhe produksionit të formatit, familjarët shprehin shqetësim të thellë për situatat e krijuara pas Prime-it të fundit.
Sipas tyre, banori Rogert Sterkaj ka përdorur vazhdimisht gjuhë fyese dhe denigruese ndaj Selin Bollatit, duke cenuar seriozisht figurën dhe integritetin e saj, si në aspektin personal ashtu edhe profesional. Familja thekson se janë hedhur insinuata dhe akuza të pavërteta, përfshirë aludime për përfitime financiare dhe vënie në dyshim të aftësive të saj si balerinë.
Në letrën zyrtare përmendet gjithashtu se janë artikuluar pretendime të pabazuara edhe ndaj vetë produksionit, duke sugjeruar shkelje të rregullores nga ana e Selinit. Sipas familjes, deklarata të tilla jo vetëm që dëmtojnë imazhin e saj, por cenojnë edhe besueshmërinë e programit.
Në përmbyllje, familja kërkon nga produksioni trajtim serioz dhe institucional të çështjes, si dhe marrjen e masave të parashikuara në rregullore, me qëllim ndalimin e gjuhës fyese, shpifjeve dhe sulmeve personale që, sipas tyre, kanë kaluar çdo kufi të pranueshëm.
