Një mesazh shqetësues ka mbërritur në redaksinë e Infopress Albania nga një punonjës i sistemit shëndetësor, i cili ngre alarmin për një problematikë serioze që, sipas tij, prek të gjithë personelin shëndetësor në vend.
Sipas denoncimit, paga e muajit dhjetor 2025 nuk është kaluar ende, pavarësisht faktit se mjekë, infermierë, sanitare dhe personel drejtues kanë vijuar punën pa ndërprerje, edhe gjatë emergjencave civile dhe festave të fundvitit.
“Vazhdojmë të punojmë edhe në këtë periudhë të vështirë, por paga ende nuk është kaluar. Është skandaloze. Kujtohen për ne vetëm kur duhen foto për reklama, ndërsa kur pyesim për pagën marrim vetëm heshtje dhe injorim”, – thuhet në mesazhin e mbërritur në redaksinë tonë.
Sipas burimit, problemi nuk kufizohet vetëm në QSUT, por shtrihet edhe në spitale të tjera të vendit, çka e bën situatën edhe më alarmante për funksionimin normal të shërbimit shëndetësor.
Punonjësi shëndetësor thekson se kjo gjendje po prek rëndë moralin dhe dinjitetin e atyre që janë në vijën e parë të shërbimit ndaj qytetarëve, duke punuar nën presion të vazhdueshëm dhe me përgjegjësi të lartë.
Redaksia e Infopress Albania e konsideron këtë një problem serioz social dhe institucional dhe i bën thirrje institucioneve përgjegjëse që të reagojnë urgjentisht, të sqarojnë situatën dhe të japin një zgjidhje të menjëhershme.
Zëri i personelit shëndetësor nuk mund të injorohet.
Infopress Albania do të vijojë të ndjekë këtë çështje dhe u bën thirrje punonjësve të tjerë të shëndetësisë të na shkruajnë për çdo problematikë që prek interesin publik.
