Nga Adelina Pali
Ka histori që nuk tregohen me zë të ulët. Ato duhen thënë fort, me gjithë peshën e frymës që mbajnë brenda. E tillë është edhe historia e Xhoana Shehut, një vajzë 22-vjeçare, rrugëtimi i së cilës të lë pa fjalë.
Xhoanën e kam njohur tre vite më parë, në një auditor studentor, ku u shfaq si një dritë e pastër mbi një skenë modeste. Që në interpretimin e parë krijoi emocione të mëdha dhe u vlerësua me vendin e parë – jo si shpërblim, por si njohje e qartë e talentit të saj të jashtëzakonshëm.
Ndërkohë që shumë të rinj 18–19 vjeç kërkojnë ende veten, Xhoana ndërtoi jetën e saj: gjeti dashurinë, krijoi familje dhe u bë nënë e dy fëmijëve – një vajze dyvjeç e gjysmë dhe një djali tetëmuajsh. Por aty ku të tjerët do të ndaleshin, ajo vendosi të kthehej. U rikthye në universitet, në art, në ëndrrën që nuk ia mbyti as martesa, as përgjegjësitë, as netët pa gjumë.
Këtë vit e ftova sërish në Festivalin Kombëtar Letrar “Nën dritën e fjalës”, ku realizoi një mini dramë së bashku me dy vajza të tjera. Edhe këtë herë tregoi po atë forcë artistike që e karakterizon. Vinte nga Durrësi çdo dy ditë, shpesh e lodhur, ndonjëherë e përgjumur… por gjithnjë e pranishme, e përkushtuar dhe e vendosur.
Jashtë provave, bashkëshorti i saj priste në makinë me dy fëmijët – një mbështetje e heshtur, por thelbësore. Një skenë e thjeshtë, që përkufizon dashurinë e vërtetë.
Pak para festivalit, ajo mori sërish vendin e parë në një garë studentore. Ndërsa vetëm tre ditë më parë, në UAMD, u vlerësua me vendin e dytë – një tjetër dëshmi që mundi i saj nuk shkon kot dhe se gjurmët që lë nuk zhduken lehtë.
Xhoana është një ese më vete: një ese mbi forcën femërore, mbi dashurinë që të çliron, mbi një rini që nuk frikësohet nga përgjegjësia, mbi ëndrrat që nuk presin “momentin e duhur”. Ajo dëshmon se talenti, edhe kur mbulohet nga përditshmëria, gjen gjithmonë rrugë për të shpërthyer.
Në një vend ku shpesh rinia akuzohet për dembelizëm apo mungesë vizioni, Xhoana qëndron si shembull i kundërt. Vetëm 22 vjeçe, nënë e dy fëmijëve, studente e rregullt, artiste e përkushtuar – një vajzë që i mban të gjitha mbi supe me dinjitet dhe forcë.
Njerëz të tillë nuk duhen vetëm përgëzuar, por duhen marrë shembull.
Rinia shqiptare ka shpresë, sa ka vajza si Xhoana.
Arti ka të ardhme, sa ka zemra që rrahin si e saja.
Jeta ka bukuri, sa ka njerëz që nuk dorëzohen.
Dashuria është e plotë, sa ka burra që mbështesin ëndrrat e gruas së tyre.
Kjo është Xhoana – një forcë që nuk ka nevojë të bërtasë për t’u dëgjuar, një dritë që nuk ka nevojë për skenë për të shkëlqyer.
Të lumtë, Xhoana — vazhdo të shkëlqesh. Arti yt ka shumë për të dhënë.
Xhoana Shehu ka lindur më 9 gusht 2003 në Peshkopi (Dober). Aktualisht jeton në Durrës, ku ka ndjekur dhe arsimin e lartë.
Ajo vjen nga një familje e përbërë nga gjyshi, gjyshja, mamaja, babai dhe vëllai, të cilët kanë pasur një ndikim të rëndësishëm në formimin dhe zhvillimin e saj personal.
Xhoana ka përfunduar studimet e larta në degën Matematikë–Informatikë në Durrës, duke ndërtuar një bazë të fortë në fushën e shkencave ekzakte dhe teknologjisë.
Përpara studimeve, Xhoana ka qenë sportiste për 7 vite, duke luajtur volejboll me ekipin “Korabi”. Angazhimi i saj sportiv i ka zhvilluar cilësi të rëndësishme si disiplinë, këmbëngulje dhe punë në grup.
Ajo ka një pasion të veçantë për volejbollin, interpretimin dhe aktrimin, si edhe për matematikën, të cilën e konsideron një nga fushat ku shpreh më së miri aftësitë e saj.
Xhoana po kërkon mundësi të reja profesionale dhe është e orientuar drejt zhvillimit të mëtejshëm në fushën e studimeve të saj dhe pasioneve personale.
