Ish-deputeti Eduart Ndocaj ka reaguar ashpër në rrjetet sociale lidhur me mënyrën se si u zhvilluan zgjedhjet e pjesshme vendore në Shqipëri krahasuar me ato në Kosovë, duke deklaruar se “jemi 100 vite pas Kosovës” në funksionimin e demokracisë elektorale dhe pluralizmit politik.
Në reagimin e tij, Ndocaj vë në dukje ndryshimet e forta në kulturën zgjedhore mes dy vendeve, duke nisur nga administrimi i procesit, klima politike dhe sjellja e kandidatëve.
Sipas tij, në Kosovë numërimi i votave përfundoi brenda natës, ndërsa në Shqipëri procesi nisi me vonesë dhe u përmbyll vetëm mëngjesin e ditës së sotme. Ai nënvizon gjithashtu se në Kosovë gara ishte reale, kandidatët rivalë u uruan publikisht dhe partitë opozitare, pavarësisht ndarjeve të brendshme, arritën të fitonin shumicën e bashkive kryesore.
Ndërkohë, në Shqipëri – thotë Ndocaj – fituesit u shpallën paraprakisht që para ditës së votimit, opozita nuk arriti të ofronte as një logo të bashkuar, dhe ndërsa në Kosovë u kryen arrestime për dyshime mbi shkelje zgjedhore, në Shqipëri “shpërblehen” ata që angazhohen në patronazhime apo presione ndaj votuesve.
Ish-deputeti thekson edhe diferencën në lidership: në Kosovë shumica e figurave kryesore politike janë të moshës 40-50 vjeç, ndërsa në Shqipëri politika dominohet ende nga e njëjta gjeneratë që “po vegjeton prej 30-40 vitesh, pa rotacion e pa prurje të reja”.
Në përfundim, Ndocaj thekson se harta elektorale e Kosovës dëshmon një demokraci të vërtetë pluraliste me 5-6 aktorë politikë në garë, ndërsa në Shqipëri mbizotëron një ngjyrë e vetme, shoqëruar me nivele rekord të mospjesëmarrjes (18%) dhe fitore të thella deri në 83%, të cilat ai i quan “njolla në biografi”.
Reagimi i tij ka ngjallur diskutime mbi krahasimet në funksionimin e demokracisë dhe konkurrencës politike mes dy vendeve të rajonit.
