Në kabinetin e ri qeverisës “Rama 4”, këtë herë do të ketë një risi, pasi do të përfshihet edhe inteligjenca artificiale.
“Diella” është një personazh i krijuar me AI, që do të ketë për detyrë menaxhimin dhe drejtimin e prokurorimeve publike. Gjatë asamblesë së PS, Rama njoftoi se tashmë tenderat do të jepen me anë të Inteligjencës Artificiale, për të shmangur çdo dyshim për abuzime brenda ministrive.
Rama: “Diella”, anëtarja e parë jo fizikisht e pranishme, por virtualisht e krijuar nga Inteligjenca Artificiale e një qeverie, do ketë në mbështetje një strukturë të posaçme për adoptimin e AI në proceset qeverisëse dhe një mandat të posaçëm për të shembur frikën e paragjykimeve dhe ngurtësisë së administratës. Dje në mbledhjen e fundit të qeverisë së tretë, u mor dhe vendimi i fundit, për nxjerrjen e tenderave jashtë nga ministritë.
Në mandatin e katërt, duhet bërë “Diella” shërbyesja e prokurimeve publike, të cilat duam t’ia kalojmë hap pas hapi AI-së, duke e bërë Shqipërinë një vend ku tenderat publik janë 100% të pakorruptueshëm dhe ku çdo fond publik që kalon përmes procedurës së tenderit është 100% i lexueshëm. Kjo nuk është fantashkencë, por detyrë e “Diellës”. Mandati i “Diellës” nuk do të ketë as kufij gjeografik, as kufij kombësie dhe struktura në mbështetjen e saj do të ketë të drejtën të punësojë këtu talente nga e gjithë dynjaja.
