Javën e ardhshme do të mbahet seanca në Apelin e Posaçëm për ish-presidentin Ilir Meta, i cili kërkon ndryshimin e masës së sigurisë. Gazetarja Glidona Daci raporton se më 17 korrik, është caktuar data kur Apeli i Posaçëm do të shqyrtojë ankimimin e kryetarit të Partisë së Lirisë kundër vendimit që e la në paraburgim që prej 21 tetorit të vitit 2024.
Trupa gjykuese e Apelit të Posaçëm do të vendosë nëse Meta do të vijojë të qëndrojë në qeli, apo do të përballet me procesin gjyqësor kundër tij në gjendje të lirë.
Por kjo nuk është e vetmja kërkesë e ish-presidentit Ilir Meta për liri. Kujtojmë se ai i është drejtuar edhe Gjykatës Kushtetuese ku kërkon shfuqizimin si antikushtetues të vendimit të 27 shkurtit të Gjykatës së Lartë që e la në masën e sigurisë arrest me burg si dhe prishjen e vendimeve edhe në shkallët më të ulëta, atë të Apelit të Gjykatës së Posaçme më 19 nëntor 2024 dhe të Shkallës së Parë më 20 dhe 23 tetor 2024.
Kujtojmë se Meta dhe ish-bashkëshortja e tij, Monika Kryemadhi janë marrë të pandehur nga SPAK për korrupsion, pastrim parash dhe mosdeklarim të pasurisë. Ish-presidenti Meta ndodhet në qeli që prej 21 tetorit të vitit 2024, ditën kur ai u arrestua.
