Olta Sheta ka qenë e ftuar në “Live From Tirana” me Ronaldo Sharkën. Ajo ka diskutuar mbi disa nga ngjarjet më të bujshme që ndodhën gjatë finales së madhe të “Big Brother VIP 4”.
Diçka që ka ngjallur shumë debat dhe është diskutuar në studiot televizive, është fakti se Gjesti ngriti flamurin e Kosovës pas fitores në BBV4.
Si e komenton ti këtë?
“Kur e pashë Gjestin që ngriti flamurin e Kosovës nuk më erdhi mirë sepse si shqiptarët e Kosovës dhe si shqiptarët e Shqipërisë, përfaqëson vetëm nga një flamur që është kuqezi. Nuk mund ta mohoj që është flamuri i Kosovës, por mendoj që për shqiptarët e Kosovës, ai është një flamur i imponuar dhe jo i dëshiruar. Ata janë shumë patriotë dhe brenda zemrës së tyre, është vetëm flamuri kuqezi. Ne kemi parë edhe sportistë të kombëtares që luajnë për Zvicrën apo Gjermaninë, edhe pse janë shqiptarë të Kosovës, ata pas atij shteti që përfaqësojnë, ngrenë flamurin kuqezi. Nuk kam parë ndonjë që të ngrejë flamurin e Kosovës.
Kam dëgjuar një intervistë të një shqiptari të Kosovës në një televizion në Kosovë qe tha: ‘Nuk ka komb kosovar, ka vetëm komb shqiptar dhe ne duhet të quhemi shqiptarët e Kosovës’. Dhe ka shumë të drejtë. Gjesti e bëri me paramendim apo e bëri rastësisht, mund ta justifikojmë që ia hodhën, e ngriti, ishin emocionet, nuk e mendoi gjatë, ai kishte një avantazh, mikrofonin e kishte dhe me shumë pak fjalë, unë mendoj se duhet të kishte thënë: ‘Përveç flamurit të Kosovës, unë edhe pse nuk e kam në këto momente flamurin kuqezi, në zemrën time është gjithmonë flamuri kuqezi’. Dhe do ia kishte mbyllur gojën të gjithëve.
Por kur Gjesti ka hyrë në BBV në Shqipëri, ka qenë një tendencë e tij për të përdorur këtë kartën e patriotizmit dhe duke futur indicie që ne shqiptarët e Shqipërisë, nuk i duam shqiptarët e Kosovës. Gjesti e ka përdorur me shumë banorë, kundër G-Banit, Jozit… Nëse banorët nuk kanë dashur Gjestin, nuk kanë dashur Gjestin si individ, por jo se është nga Kosova. Gjesti nuk mund të përfaqësojë Kosovën. Këto ndasitë janë bërë qëllimisht nga Gjesti për t’u viktimizuar dhe për të ngritur shqiptarët e Kosovës që të votojnë pro Gjestit dhe të japin indicien se shqiptarët e Shqipërisë nuk e duan”.
