Nga Klea SPAHO
Të dashur banorë të Devollit,
që çdo ditë punoni tokën, që djersën e ktheni në bereqet, që me duart tuaja rritni shpresën e këtij vendi…
Devolli ynë i bukur, toka jonë pjellore, është sot më shumë se kurrë një dëshmi e dhimbjes dhe padrejtësisë. Varfëria ka pllakosur në çdo cep, dhe fermeri, ky shtyllë e ekonomisë sonë, është lënë në harresë.
Sot, fermerët e Devollit nuk marrin subvencione. Shteti që duhet t’u gjendet pranë, është i zhdukur. Prodhimet tona, të mbjella me mund dhe me shpresë, kalben në fushë apo hidhen në lumenj. Sepse tregu është i pushtuar nga importet, nga prodhimet e huaja që vijnë nga Serbia, ndërsa prodhimi ynë, djersa jonë, përçmohet.
A është e drejtë kjo?
A meriton Devolli një trajtim të tillë?
Mundimi i një viti të tërë, shpesh përfundon në plehra, jo sepse nuk është cilësor, por sepse nuk ka një shtet që ta vlerësojë, ta mbrojë dhe ta përkrahë. Nuk ka një qeveri që ta ketë zemrën me njerëzit e këtij vendi.
Por sot, ndryshimi është i mundur. Shpresa ekziston. Dhe ajo shpresë është Partia Demokratike. Është numri 1 në fletën e votimit. Është kthimi i buzëqeshjes për Devollin. Është shpërblimi i çdo pikë djerse të një fermeri, si dikur, në kohën kur qeveriste Doktor Sali Berisha, kur vendi ecte përpara, kur bujqësia kishte zë dhe mbështetje.
Ne nuk mund të rrijmë më duarkryq. Ne nuk mund të presim më.
Vota juaj është arma më e fortë që keni!
Mos e shisni, mos e humbni! Vota është gjëja më e shenjtë që ka një qytetar. Ajo vendos për fatin e fëmijëve tanë, për të ardhmen e të gjithë neve. Me një votë, ju mund të mposhtni varfërinë, të ktheni dinjitetin, të ndizni dritën e shpresës në çdo shtëpi devollite.
Ndryshimi nis nga secili prej nesh.
Të bashkohemi të gjithë për një Devoll që punon dhe fiton, jo që punon dhe humb!
Të bashkohemi për një Shqipëri që kujdeset për fshatin, për fermerin, për familjen!
Votoni numrin 1! Votoni Partinë Demokratike!
Ktheni shpresën në Devoll! Ktheni nderin, ktheni jetën, ktheni të ardhmen!
