Momenti për Ndryshim!
Sot, subjektet zgjedhore nisin zyrtarisht fushatën elektorale për zgjedhjet parlamentare të datës 11 Maj 2025.
Në këtë moment të rëndësishëm, në radhë të parë uroj një fushatë të qetë brenda etikës qytetare, të bazuar në ide, programe dhe përballje dinjitoze, larg konflikteve apo incidenteve që dëmtojnë imazhin e secilit prej nesh dhe të vendit tonë.
Këto zgjedhje nuk janë thjesht një proces rotacioni politik – ndonëse i domosdoshëm – por një mundësi historike për ndryshim.
Ky është momenti për t’u shkëputur njëherë e mirë nga kjo mazhorancë qeverisëse që e ka degraduar vendin dhe shoqërinë tonë në çdo aspekt.
Prandaj, sot është koha të lëmë mënjanë çdo pakënaqësi personale dhe çdo rezervë të brendshme ndërpartiake duke u bashkuar në këtë rrugë për ndryshim. Nesër, pas fitores, le të jetë dita për reflektim dhe ndërtim të një qeverisjeje ndryshe.
Sot, nuk duhet të tundohemi, frikësohemi apo të ndikohemi nga presioni, shantazhi apo blerja e votës – mekanizma këto të një makinerie shtetërore që kërkon të ruajë pushtetin me çdo kusht.
Qytetari votues është më i fuqishëm se kushdo tjetër. Vota e tij është arma më e fortë për të larguar të keqen dhe për të ndërtuar një të ardhme ndryshe, të frikësuar janë dhe duhet të jenë ata…
Janë dhe duhet të jenë sot më të frikësuar, para ndëshkimit të votës qytetare, të përlyerit me pëtfitime të paligjshme dhe korrupsion, qoftë zyrtarë qendrorë apo lokalë.
Ata bërtasin dhe ngrenë zërin në panik, si dikush i humbur në pyll, që bërtet nga frika dhe hutimi, pa ditur rrugën për të dalë prej andej.
Prandaj, sot, të gjithë bashkë në sheshin “Nënë Tereza”, ora 19:00, për të nisur rrugën e ndryshimit dhe fitores!
Kur Shqipëria të bëhet madhështore, atëherë Evropa hapet për ne!
