Nga Shpetim Axhami, kryetar i PLL
Burrështetasit kanë vetëm ditëlindje, ata mbeten të pavdekshëm falë veprës, përkushtimit të tyre dhe asaj që ata bëjnë për komb dhe për atdhe.
I tillë mbetet NTM Zog I Mbret i Shqiptarëve🇦🇱
Mbretin Zog I, një vizionar shumë dimensional, politikan dhe diplomat, atdhetar dhe patriot nacionalist, që udhëhoqi gjithë jetën e Tij me moton “ATDHEU MBI TË GJITHA.”
Në moshë të re, vetëm 17 vjeç, Ahmet Zogu ishte pjesëmarrës në Shpalljen e Pavarësisë së Shqipërisë.
Jetësimi i vendimeve të Kongresit të Lushnjës më 1920, ku filloi institucionalizimi i shtetit shqiptar, “Triumfi i Legalitetit” më 1924 ku u hodhën themelet demokratike të një stabiliteti politik, si dhe shpallja e Mbretërisë Kushtetuese në vitin 1928 – janë etapa të rëndësishme historike të cilat mbajnë emrin e Ahmet Zogut.
Mbreti Zog I bëri më shumë se çdo kryetar e drejtues shteti tjetër që nga Shpallja e Pavarësisë e deri më sot.
Nga deputet, ministër, kryeministër, president, e deri Mbret i Shqiptarëve – Ai solli stabilitet dhe zhvillim, rend e qetësi, bëri shtet institucional të së drejtës ku cilido para ligjit ishte i barabartë, solli hapje drejt perendimit dhe ruajti sovranitetin tonë kombëtar, vlerësoj pronën dhe të drejtën e besimit në një shtet laik dhe të civilizuar duke bërë fiset shtet dhe shtetin komb.
Në vitin 1939, me fillimin e Luftës së Dytë Botërore, si shumë mbretër të tjerë europianë, me vendim parlamenti u detyrua të largohej nga Shqipëria, por jo nga përkushtimi i Tij ndaj politikës, diplomacisë dhe çështjes kombëtare. Ai kurrë, deri kur, si sot më 9 Prill të vitit 1961 ndërroj jetë, nuk e ndali punën për bashkim kombëtar dhe për një Shqipëri perendimore pa komunizëm.
Në “Urdhrin e Flamurit Kombëtar”, akorduar nga Kryetari i Shtetit, në vitin 2012, me rastin e 100-vjetorit të Pavarësisë Kombëtare, thuhet:
“Figurë madhore dhe qendrore e historisë së Shqipërisë, që hodhi themelet e ndërtimit dhe funksionimit të shtetit modern shqiptar, me orientim të qartë perëndimor dhe europian.
Ideator dhe realizues i administratës së parë të shtetit shqiptar, si dhe i një legjislacioni bashkëkohor të niveleve të larta, që do t’i hapte rrugë emancipimit shoqëror dhe zhvillimit të vendit.Personalitet që gjithë jetën e tij e lidhi me fatet e kombit, të Shqipërisë dhe të shqiptarëve”
Po këtë vit, më 17 nëntor 2012, shteti shqiptar zhvilloi një ceremoni zyrtare për rivarrimin e eshtrave të NMT Zog I, Mbret i Shqiptarëve, në mauzoleun e sapondërtuar të Familjes Mbretërore në Tiranë.
Pas 73 vitesh, Mbretit Zog iu përmbush amaneti për t’u rikthyer në atdhe.
I paharruar qoftë kujtimi i NMT Zog I, Mbret i Shqiptarëve!🇦🇱
