Flasim sot, pas zgjedhjeve primare, ku anëtarësia e Partisë Demokratike ka shprehur vullnetin e saj. Ky ka qenë një hap i madh për forcimin e demokracisë së brendshme dhe për përgatitjen tonë për betejën e vërtetë – betejën kundër një regjimi që çdo ditë po e çon Shqipërinë drejt shkatërrimit.
E di që ka pasur pakënaqësi, ndoshta edhe zhgënjim. Disa janë ndier të lënë jashtë, disa të padrejtësuar. Por sot dua t’ju kujtoj të gjithëve një gjë të rëndësishme: lufta jonë nuk është me njëri-tjetrin! Ne nuk jemi kundërshtarë, ne jemi shokë të një rruge të gjatë dhe të vështirë për të shpëtuar këtë vend nga kthetrat e Edi Ramës.
Armiku ynë nuk është brenda Partisë Demokratike. Armiku ynë është ai që po e shpopullon Shqipërinë, ai që po e varfëron ekonominë, që po i mbyll dyert e së ardhmes rinisë shqiptare, që po e trajton këtë vend si pronë private!
Nëse sot ne e shpërdorojmë energjinë tonë në përçarje, nëse lodhemi duke luftuar me njëri-tjetrin, atëherë kemi bërë pikërisht atë që Edi Rama dëshiron! Por nëse sot bashkohemi, nëse ngrihemi mbi interesat personale dhe vendosim të luftojmë së bashku, atëherë Shqipëria ka një shpresë!
Prandaj, le ta lemë pas çdo hatërmbetje dhe të shohim përpara! Ne kemi një detyrë historike, një përgjegjësi kombëtare për të larguar këtë regjim dhe për t’i kthyer shqiptarëve besimin te politika, te demokracia dhe te e ardhmja.
