Kreu i Partisë Demokratike, Sali Berisha, me rastin e Ditës së Veres ka vizituar Elbasanin. Nga “kryeqyteti” i festimeve të 14 marsit, Berisha u shpreh se kjo ditë i gjen shqiptarët më optimistë dhe besimplotë në ndryshimin e madh të 11 majit.
“Kjo ditë frymëzon çdo shqiptar që me 11 maj të ndahet nga ky regjim që i varfëroi ata gjer në palcë. Dhe unë sot nga Elbasani dua t’u premtoj shqiptarëve kudo që janë se tre muajt e parë, ajo që e kemi quajtur paketë e dhembshurisë, do të nxjerrë çdo shqiptar nga varfëria ekstreme, ata që janë.”- u shpreh ai.
Berisha premtoi sërish minimumin jetik prej 200 eurosh, rritje me 20% të pensioneve, rrogë minimale 25% më të lartë dhe rrogë mesatare 1200 euro nëse vjen në pushtet pas zgjedhjeve të 11 majit.
“Shqipërinë po e zbraz varfëria, ndërkohë që nuk ka një vend tjetër më të pasur në pasuri natyrore. Kështu që ju ftoj ta vazhdojmë së bashku këtë betejë. Me 11 maj ne shkojmë besimplotë, shkojmë me programin më të mirë për të ndryshuar jetën e shqiptarëve.”- deklaroi Berisha.
Mes të tjerash Berisha thotë se vendimi i Dashnor Sulës për t’u bashkuar me Adriatik Lapajn ishte i gabuar, por sipas tij ka sërish kohë që ta mendojë.
“Sa i përket deputetit që thatë ju, ai bëri zgjedhjen e tij, midis betejës në sheshin e burrave zgjodhi Tikun dhe shkoi në punën e vet, nuk kam çfarë të them bëri gabim por prapë ka kohë ta mendojë.”- ishte mesazhi i Berishës për Sulën.
