Fjala e Adela Balliu, studente e mjekësisë, me rastin e 100-vjetorit të “Triumfit të Legalitetit”
I nderuar Lartësia Juaj Princ Leka II,
I nderuar Kryetar i Partisë Lëvizja e Legalitetit, z. Shpëtim Axhami,
Të dashur pjesëmarrës në këtë takim,
Unë jam Adela Balliu, deri dje studente në Mbretërinë e Bashkuar, ndërsa sot vijoj studimet në degën e mjekësisë këtu në Tiranë. Prania ime sot në këtë sallë, si pjesë e juaja, lidhet me përcjelljen e një mesazhi shumë të qartë: ëndrra dhe ambicia ime është të ndërtoj të ardhmen në Shqipëri, ashtu siç dëshiroj dhe shpresoj për bashkëmoshatarët e mi.
Ne, të rinjtë, sot kemi një dëshirë dhe një kërkesë thelbësore: duam një Shqipëri ku arsimi të jetë prioritet i vërtetë, jo vetëm në fjalë, por në vepra. Kërkojmë universitete cilësore, ku profesorët respektohen dhe ku studentët përgatiten për sfidat e së nesërmes, pa pabarazi apo pengesa burokratike.
Ne nuk kërkojmë privilegje, por mundësi të barabarta, të bazuara në meritokraci dhe drejtësi. Duam një shoqëri ku të gjithë të rinjtë të ndihen të integruar në çdo aspekt të jetës – qoftë në arsim, punësim apo drejtim. Ne duam të kemi mundësinë të emërohemi dhe të zgjidhemi me të njëjtat standarde si çdo i ri tjetër në vendet demokratike dhe të zhvilluara perëndimore.
Është e dhimbshme të shohësh bashkëmoshatarët që ëndërrojnë të ikin jashtë, jo sepse duan të braktisin atdheun, por sepse këtu ndihen të pashpresë. Kjo hemorragji e trurit dhe energjisë rinore duhet të ndalet, dhe kjo është përgjegjësi, mbi të gjitha, e faktorëve politikë dhe qeverisës. Politika duhet të krijojë kushtet që të rinjtë të ndihen krenarë që jetojnë dhe kontribuojnë në Shqipëri.
Ne nuk duam një Shqipëri ku korrupsioni, padrejtësia dhe mungesa e perspektivës na detyrojnë të largohemi. Duam një Shqipëri ku rinia të mos jetë vetëm retorikë fushatash elektorale, por një prioritet i përhershëm.
Politika ka fuqinë të ndryshojë këtë realitet, por për këtë nevojitet vullnet, vizion dhe ndershmëri. Jam e bindur se potencialet intelektuale dhe njerëzore për këtë ndryshim ekzistojnë – ndoshta shumë prej tyre janë pikërisht këtu, në këtë sallë.
Si pjesë e brezit të ri, unë besoj se ëndrrat dhe kontributet tona duhen lidhur me familjen dhe atdheun mëmë, e jo me emigrimin. Është detyra jonë të jemi zëri i së ardhmes dhe forca e ndryshimit pozitiv.
Së bashku, të ndërtojmë të ardhmen që ëndërrojmë.
Ju falënderoj me respekt dhe entuziazëm!
Faleminderit!
