Berisha deklaroi:
Kryetari i Partisë Demokratike, Sali Berisha duke folur në tubimin qytetar, është shprehur se sot Edi Rama, kryehajduti i kombit i të gjitha kohërave, zgjodhi me një cinizëm ekstrem tu flasë shqiptarëve përsëri për labaroskopinë e tij, duke harruar se ka lënë pa ilaçe mijëra shqiptarë, pasi ka vjedhur bashkë me ministrat dhe drejtuesit e QSUT-së, paratë.
Gjatë fjalës e tij përpara protestuesve, kryedemokrati Sali Berisha, është shprehur se negociatat janë hapur dhe se çdo shqiptar duhet ta dijë, që këto negociata janë hapur tërësisht për shkaqe gjeostrategjike.
Berisha theksoi se Partia Demokratike si lokomotivë e proceseve integruese, si një parti që mbështet dhe konsideron integrimin e shqiptarëve në BE si të ardhmen më të mirë të tyre, deklaron para shqiptarëve dhe botës se përveç kriterit gjeostrategjik, narkoregjimi i Edi Ramës nuk plotëson asnjë kriter tjetër për integrimin në BE.
Kreu i PD, Sali Berisha në fjalën e tij përpara protestuesve është shprehur se drejtimi i Shqipërisë me Edi Ramën, është drejtimi drejt shfrytëzimit kolonjal nga një pushtim i mbarë shqiptarëve. Ai theksoi se drejtimi i Shqipërisë me Edi Ramën, është drejtimi drejt një vendi pa drejtësi, me vetëgjyqësi, drejt një vendi ku qytetarët presin 15 vite për një vendim gjyqësor, ku prokurorë dhe gjykatës special janë në garë të rrjepin sa më shumë qytetarët.
Kryetari i Partisë Demokratike, Sali Berisha në fjalën e tij në tubimin qytetar, deklaroi se se me Edi Ramën nuk ka kurrë integrim të Shqipërisë. Berisha ka theksuar se na përket ne të marrim fatin në duart tona, na përket ne me mosbindje civile të krijojmë qeveri teknike, ta kthejmë Shqipërinë në drejtimin e duhur.
