Egnatia u shpall kampione e Shqipërisë për sezonin 2023-2024, pasi mundi mbrëmjen e djeshme Partizanin në finale me rezultatin 1-0.
Egnatia e mbylli kampionatin e rregullt në vendin e parë me pikë të barabarta me Partizanin (63 secila), por kreu u takon rrogozhinasve për shkak të ndeshjeve direkte me të kuqtë, duke pasur një bilanc më të mirë (një fitore dhe tri barazime).
Klubi rrogozhinas merr shpërblim 100 milionë lekë (të vjetër) si kryesues i Superiores pas 36 javëve. Egnatia është fituese e Kupës, pasi mundi Kukësin në finale me shifrat 1-0. Si shpërblim nga FSHF-ja merr 50 milionë lekë të vjetër.
Egnatia, Partizani, Vllaznia dhe Tirana kishin siguruar pjesëmarrjen në Kupat e Europës, sido që të shkonin rezultatet e ndeshjeve në “Final 4”. Kjo ndodh për shkak se Skënderbeu është i dënuar nga UEFA dhe përfiton skuadra e renditur më mirë.
Pra, Tirana e vendit të pestë në klasifikimin pas 36 javësh kampionat, përfiton nga rregullorja për kualifikimin në Kupat e Europës, që thotë: “Në rast se ekipi fitues i Kupës (Egnatia) është i renditur në njërin prej tri vendeve të para të ‘Final 4’, vendin e tij do ta zërë ekipi i renditur më mirë”.
Vendi i tretë në “Final 4” i takoi Skënderbeut pas fitores 3- 2 në finalen e luajtur në “Air Albania” kundër Vllaznisë.
Kukësi dhe Erzeni janë skuadrat që zbritën në Kategorinë e Parë.
Laçi i vendit të tetë mbijetoi në Superiore falë ndeshjes “play out” që zhvilloi kundër Flamurtarit, ku fitoi 3-1 pas kohës shtesë.
Kryegolashënues i Superiores për sezonin 2023-2024 u shpall sulmuesi i Vllaznisë, Bekim Balaj, me 18 gola të realizuar.
