Princ Leka ka kallëzuar në polici ish-bashkëshorten e tij, Elia Zaharia, dhe babanë e saj, Gjergj Zaharia. Princi i akuzon të dy për dhunë ndaj tij.
Sipas denoncimit, Princ Leka ka shkuar të takojë vajzën, Geraldinë, kur është përballur fizikisht me ofendimet e Gjergj Zaharisë, dhe më pas me dhunë fizike.
Princ Leka ka kërkuar edhe urdhër mbrojtje, po ashtu edhe Zaharia.
Kujtojmë se më 15 janar, Princ Leka, njoftoi përmes një postimi në rrjetet sociale se ai dhe Elia Zeharia i kishin dhënë fund martesës së tyre.
“Me anë të këtij postimi ju komunikoj zyrtarisht se LTM Princ Leka dhe Elia Zaharia kanë rënë dakord që martesës së tyre tì jepet fund.
Duke qenë se martesa e ka humbur funksionin e saj, kanë parë të udhës ta zgjidhin atë me pëlqim reciprok duke filluar procedurat e nevojshme ligjore.
Pavarësisht besimit tek instituti i familjes, Princ Leka II beson se vlerat e respektit dhe mirëkuptimit reciprok do të përbëjnë bazën e marrëdhënies në vijimësinë e saj, që do të ketë si motiv rritjen e edukimin e LSM Princeshës Geraldinë.
Mirëqenia shpirtërore dhe fizike e vajzës, LSM Princeshë Geraldinës, do mbetet në qendër të vëmendjes së tyre, të përkushtuar për të siguruar një jetë të lumtur dhe të sigurt për Geraldinën.
LTM Princ Leka II nuk do të bëjë deklarata apo komente të mëtejshme dhe kërkon që të respektohet e drejta për privatësi me këtë çështje”, njoftonte Princ Leka.
