Belind Këlliçi, kandidat i Partisë Demokratike për Bashkinë e Tiranës, e quan fitore anulimin e tenderit për ndërtimin e rrugës “Xhon Belushi”. Sipas tij, kontrata e prokurimit ka qenë fiktive dhe rruga do bëhej me asfalt elektoral.
“Një fitore për Tiranën! Anullohet tenderi fiktiv për Rr. “Xhon Belushi”. Kur bëhemi bashkë tërhiqet bashkia. Kur bëhemi bashkë parandalojmë vjedhjen e taksave tona. Kurdo natën të hidhet asfalt elektoral, unë do të jem atje! Bashkë Tirana! Forca”, shkruan Këlliçi.
Ndërkohë, kryebashkiaku Erion Veliaj në një intervistë për News 24, është shprehur se Bashkia e ka anuluar vetë tenderin. Sipas Veliajt, në kushtet kur procedurat po zgjasnin, tenderi është anuluar sepse rruga do të ndërtohet nga ndërmarrja bashkiake.
“Siç bëjmë rëndom në Bashkinë e Tiranës, për sa kohë që kemi vetë një fabrikë asfalti, vendosëm ta anulojmë atë garë. Është anuluar që javën e kaluar, por kështu është kur nuk ke bërë ndonjëherë ndonjë punë dhe nuk i njeh rregullat e shtetit dhe për sa kohë që ajo garë është anuluar, ka hyrë ndërmarrja e bashkisë për ta mbyllur sepse na duhej një ndërhyrje e menjëhershme, duke qenë se Ujësjellësi tashmë e kishte bërë gjithë punën e vet, dhe nuk mund ta linim rrugën deri në 2-3 muaj, sa vijojnë procedurat”, tha Erion Veliaj.
