Nga Marsela LEKLI, psikologe
Tashmë, është realitet! Dhuna në familje po njeh përmasa të frikshme! Statistikat dhe raportimet janë marramëndëse. Një shoqëri që vegjeton në varfëri ekstreme nuk mund ta përligjë kurrsesi dhunën në familje, fenomen i cili gjatë këtyre tre dekadave është shfaqur me monstruozitetin e tij.
Tjetër vrasje sot dhe sërish raportohet për një viktimë, e cila përvecse mbështillet me tisin e mëshirës së opinionit, merr me vete dhe përgjegjësinë e institucioneve që asnjëherë nuk po e trajtojnë me hapa efektivë, por thjeshtë si një problem individual. Kjo qasje e institucioneve dhe e shtetit shqiptar ndaj fenomenit të dhunës në familje, dëshmon shkallën e primitivizmit shoqëror të një kombi dhe padobishmërinë e insitucjoneve dhe shoqatave që përfitojnë fonde për parandalimin e saj. Ngjarja e sotme në Fier, ku burri vret gruan dhe e raporton si të vetvrarë, është drama e bjerrjes së vlerave morale të një shoqërie që endet kuturu në zallamahinë 30 vjecare.
Nisur nga rastet në rritje dhe padobishmërinë e efektivitetit të deritanishëm, është imperative hartimi i strategjive kombëtare për të siguruar mekanizma konkrertë që të gjitha format e dhunës në familje të identifikohen, shkaktarët e dhunës të përcaktohen, ndikimet e saj të adresohen dhe politikat sociale dhe programe të ndryshme ndërhyrjeje të implementohen për të parandaluar çdo lloj pasoje që mund të dëmtojë familjen dhe mbarë shoqërinë shqiptare.
Pra, strategjitë e dhunës në familje dhe programet e ndërhyrjes duhet të përparojnë premisën e tyre se dhuna në familje është një aktivitet kriminal dhe është një sjellje e mësuar, dhe prandaj është e ndryshueshme. Në fokusin e politikave sociale dhe praktikave të lidhura me dhunën në familje, duhet të jetë përmirësimi i sigurisë së grave dhe fëmijëve dhe parandalimi i sjelljeve abuzive, frikësuese dhe të dhunshme të keqbërësve ndaj kësaj kategorie të popullatës shqiptare.
Së bashku le të kontribuojmë për parandalimin e dhunës në familje, le t’i japim fund kësaj dukurie sa të shëmtuar për vlerat qytetërues, aq dhe dramatike për sensin e një trendi bashkëkohor që përfshin në rrjedhat e zhvillimit shoqëritë njerëzore.
Në fund të fundit, kjo është përgjegjësi e shtetit!
