Nga Agron PREBIBAJ
DASMA NIKAJ-MËRTUR!
Doruntina Monda nga Curraj Eper – shkon te Marku në Rajë.
PRESIDENTI META, DASMOR NDERI!
Dasmat si gëzime familjare vijnë si prizem ngjyrash për njerëzit e afërt, duke krijuar natyrshëm një ndjenjë gëzimi e feste, aq më tepër kur ky event-ceremonial gjendet në familjen me gjenezë të fortë në historinë e trevës e më gjerë, familje, e cila ka përcjellë ndër breza, pasuri cilësish të rralla shpirtërore, tradite e forcë mendimi për identitetin e krahinës, me ngjyrë të fortë kombëtare.
Sot, u ndodhëm si në Curraj Epër, (ndonëse në ILIRIA Palase -Tiranë), pra, ishim në dasëm te Skender Përpepaj, e cila frymonte natyrshëm si një gëzim madh për familjen, si shënjtëri e kurorëzimit të çiftit të ri, pasi aty u bë përcjellja për bijën e tonë, nga prindërit, familjarët, dajat, kumbarët, miqtë e gjithë të dashurit. Vetëm këtu, kur je në dasmën -kurorëzuese, këtu ndjen kuptimin e fjalës e të gjestit, e ndjen këtë ritual që vishet e transmetohet me afeksione njerëzore, shikon sesi reflektohet e krijon një spektër të ngrohtë ai ngacmim shpirtëror i njerëzve, po, veçanërisht, adrenalina vjen e rritet, kur dasma është në Nikaj-Mërtur.
Një vajzë – pinjolle e Kukel Ndout nga Curraj Epër, shkon për t`iu bashkëngjitur përjetësisht të zgjedhurit të zemrës së saj, Mark Pepkolaj nga Raja, si një moment i ri jetësor, që do mbetet në kujtesë përjetësisht për familjen e shëndoshë me taban e virtyte, që do krijohet nga ky çift, me besimin se nga ky bashkim i lumtur, do krijohet një vatër e re, ku do cicërojnë jeta, vogëlushët, e ardhmja e familjes së shëndoshë.
Sot ne ishim shumë, mbi 600 dasmorë nga të gjitha trevat shqiptare, festuam së bashku gëzimin e natyrshëm të çiftit e familjarëve, si rast i lumtur i përbashkimit të familjeve tona, për t`u bërë pjesë e gëzimit të kësaj familje dhe e çiftit.
Dasmës në Curraj Eper, e pagëzuar Nikaj-Mërtur ju bashkangjit e njeriu unitar i kombit, Presidenti Ilir Meta së bashku me bashkëshorten.
Kjo ishte dasma e traditës shqiptare me artistë profesionistë të valles e këngës popullore e qytetare, e perse jo edhe deri te muzika e rrokut, e gjitha në derigjimin e regjizorit Llesh Nikolla, i cili elektrizoi sallën.
Urimi jonë shkon në zemër të çiftit, që ata, të dy, ta marrin këtë si fjalë –bekimi për fatin dhe dashurinë e tyre të përjetshme.
Fjalët tona shkojnë e krijojnë lutjen e sinqertë edhe për Bekimin e Zotit…
