Nga Agron PREBIBAJ
Kryetari Gecaj, i jep titullin, “Mirënjohja e Nikaj-Mërturit”
Autori Viktor Isa Selimi vjen para lexuesit me një monografi përmes së cilës na rrëfen në formën e një ditari rreth trevës së Nikaj-Mërturit e më gjerë, ku sjell dëshmi të rëndësishme të punës dhe të jetës së tij në periudha të ndryshme të sistemit të kaluar. Libri mbështetet mbi një material të pasur jetësor ku, përmes fakteve dhe imazheve të kohës, reflektohet puna e palodhur e njerëzve të asaj periudhe, përkushtimi profesional, madje edhe ideologjik, qëndrimi i njerëzve ndaj problemeve të kohës, si një angazhim serioz ndaj tyre, seriozitet që besohej se ishte më i duhuri dhe më i vërteti.
Autori e kompozon librin duke qenë vetë protagonist dhe dëshmitar okular i rrjedhave jetësore, por duke mos u dhënë thjesht pas përjetimeve të ngushta vetjake, përkundrazi, ai e sjell atë kohë plot trazime dhe sfida ku nganjëherë pasioni dhe frustimi ideologjik dilte tej mundësive. Vetë Viktori ka bërë punë të ndryshme, madje edhe pedagog i fiziologji-gjenetikës në Institutin e Lartë Bujqësor, si edhe kryeagronom, kryetar kooperative, mësues etj.
Duke i ushtruar këto profesione, Viktori ka grumbulluar një përvojë goxha të pasur, si teorike, ashtu edhe praktike në lëmin e aplikimit të tyre, po edhe të vështirësive në zbatim. Si njohës i mirë i asaj kohe ai është autentik, rrëfen ashtu siç ka qenë dhe siç ka ndodhur, pa dorashka, dhe kjo e bën librin e Tij të mbetet një dokumentar real i kohës, i cili duhet shfletuar me ëndje për ta parë e kuptuar atë kohë sa euforike, po edhe me disa arritje institucionale, të cilat krijuan baza në shkencë, në organizim, por mjerisht jo e qëndrueshme ndaj zhvillimeve kohore për më vonë, për shkak të një sistemi të çmendur dhe që drogonte njerëzit me një ideologji të gabuar.
Libri mbart një titull, i marrë nga etnografia e të folurit e trevës nikajmërturase, i cili në nëntekst ngrihet si simbolikë e asaj çfarë njeriu mban në kujtesën e tij mbushur me emocione dhe që kërkon ta ketë si pikë referimi për të gjykuar gjërat për më herët apo më vonë. Ajo çfarë ai e thekson dhe e veçon si kurorën më të ndritshme të vlerave njerëzore, ashtu siç e thotë vetë autori, është se aty gjeti njerëz të mirë, të besës, u njoh me traditat popullore, peizazhin e mrekullueshëm, me bimësinë karakteristike të asaj zone, skalitur me aq mjeshtëri natyrore. Janë interesante përshkrimet e autorit për punët e ndryshme të kooperativës, vështirësitë, arritjet, por edhe përshkrimet e porteteve njerëzore, ku spikat humanizmi, çiltërsia dhe besa e tyre, gatishmëria për t`iu gjetur tjetrit në nevojë etj.
Libri ka një mori të pafund emrash, datash të skeduara në kujtesë, të rëndësishme ose jo, të cilat lidhen me përditshmërinë e zakonshme, por edhe me data të shënuara kombëtare apo ngjarje, të cilat reflektoheshin skaj më skaj trevës duke dhënë ndikimin e tyre me përcjelljen entuziaste që u bëhej. Libri është shkruar me një gjuhë të thjeshtë, shpesh edhe lakonike, sidomos në shprehje të ndryshme frazeologjike etj.
Mendimi rrjedh natyrshëm si një përrua i qetë alpin, shoqëruar edhe me notat e humorit. Lakonizmi i shprehjes dhe lënda jetësore, shoqëruar shpesh me fakte interesante, e bëjnë këtë libër tërheqës për lexuesin, duke sjellë me origjinalitet një pjesë të rëndësishme të historisë, atëherë kur realiteti shihej njëngjyrësh, me ngjyrën ideologjike, por nuk duhet harruar se edhe spektri i ngjyrave të tjera ishte i madh dhe i vrullshëm, veçse i mënjanuar nga totalitarizmi dhe iedeologjia e kohës. Mirënjohje dhe respekt mikut të mirë të Malësisë së Gjakovës, z. Viktor Selimaj!
Kryetari i Shoqatës Nikaj-Mëtur Dr.Mhill Gecaj, i jep titullin “MIRËNJOHJA E NIKAJ-MËETURIT”
Me motivacionin:
“Për kontributin e Tij njerëzor, dashamirës, shkencor, por edhe si veprimtar i palodhur në dobi të trevës së Nikaj-Mërturit dhe si evidentues vlerash i kësaj zone dhe Tropojës në tërësi, kurorëzuar edhe në botimin monografik “Të falem Ty, o Nikaj-Mërtur”, si një vlerë e shtuar ndaj krahinës, shoqëruar me respektin dhe konsideratën e lartë për njerëzit elitarë, fisnikë e punëtorë”.
