Duke iu drejtuar besimtarëve në Sheshin e Shën Pjetrit, Papa Françesku i nxiti të mos i mbyllin sytë para tragjedisë, që vijon të luhet në Mesdhe, det, të cilin ai vetë e quajti: “Varreza më e madhe e Evropës”.
Papa Françesku e kujtoi kështu ceremoninë, që do të organizohet në Portin e Augustës, në Sicili. Ngjarje, e cila synon t’i kujtojë botës tragjedinë e 18 prillit 2015, kur një anije peshkimi, e ngarkuar me njëmijë migrantë, u mbyt në Kanalin e Sicilisë. Shpëtuan vetëm 28 vetë. Sot relikti i kësaj varke do të ekspozohet përgjithnjë në portin sicilian, pasi të kthehet nga Venediku, ku qe ekspozuar në Bienalen e vitit 2019.
