Stërvitja “Defender 2021” që po zhvillohet në disa baza ushtarake të vendit tonë, ka rrëmbyer vëmendjen e të gjitha mediave.
Në bazën ushtarake të Bizës në Martanesh, janë dislokuar një pjesë e mirë e ushtrisë amerikane dhe vendeve të tjera të NATO-s në kuadër të kësaj stërvitje e konsideruar si më e madhja që prej Luftës së Dytë Botërore.
Sot në Bizë ka qenë edhe ambasadorja e SHBA në vendin tonë, Yuri Kim. Ajo i është bashkuar stërvitjes duke bërë qitje me mitraloz dhe pistoletë. Një anë e panjohur kjo e ambasadores amerikane. Siç duket nga fotot që sjell MAPO, ambasadorja Kim është duke u trajnuar nga oficerë amerikane.
Në stërvitjen “Defender 2021” marrin pjesë më shumë se 26 kombe dhe 28 mijë trupa shumëkombëshe që do të kryejnë aktivitete pothuajse në të njëjtën kohë në më shumë se 30 zona trajnimi, të shtrira në 12 vende.
Rreth 5 000 forca amerikane po stërviten dhe veprojnë në vendin tonë që prej muajit prill e deri në qershor, të cilat do të veprojnë në vende të shumta në Shqipëri, përfshirë bazën ajrore në Kuçovë, në Farkë dhe në zonën e trajnimit në Bizë.
