“Fiter Bajrami“ ka mbledhur sot në një drekë miqësore strukturat drejtuese të grupseksionit të PD të qytetit të Pukës.
Kryetari i këtij grupseksioni, Demir Hyseni, në cilësinë e organizatorit, në përshëndetjen e rastit, krahas urimit tradicional të festës, adresoi mesazhin falënderues dhe mirënjohës për anëtarësinë e PD të grupseksionit të qytetit, pasi përballja e tyre me falangat e pushtetit në zgjedhjet e 25 prillit ka qenë titanike.
I ftuar në këtë drekë festive, ish kandidati për deputet Lodovik Hasani, në përshëndetjen e tij, teksa uroi të gjithë besimtarët myslimanë të Pukës për më shumë paqe e begati në familjet e tyre, u ndal në vlerat e bashkëjetesës fetare si dhe veçoi traditën e bukur dhe unikale të kremtimit të festave që ka treva e Pukës, si dhe apeloi për vijimin e kësaj tradite si virtyt dhe vlerë humane e banorëve fisnikë të këtyre anëve.
Nga të ftuarit, pati mesazhe urimi, por dhe një apel të përbashkët për kandidatin Hasani, që ai të vijonte të ishte i pranishëm në Pukë, si përfaqësuesi i tyre, pasi me vlerat e tij prej një kandidati fisnik dhe me integritetin politik që dëshmoi në zgjedhjet e 25 prillit, fitoi simpatinë e qytetarëve pukjanë duke dëshmuar se fituesi moral i këtyre zgjedhjeve në këtë treve ishte pikërisht ai, dhe se pukjanët ia kanë borxh mbështetjen e vazhdueshme.
Grupseksioni i qytetit të Pukës, ishte një nga strukturat më solide dhe më me peshë në zgjedhjet e 25 prillit, për bashkinë e Pukës, ku ndonëse këtu ishte përqendruar makineria e rëndë e blerjes së votave dhe presioni i madh i pushtetit, prapëseprapë rezultati ishte brenda pritshmërive të opozitës.
