Të paktën 9 persona raportohet të kenë vdekur nga të shtënat me armë në një shkollë në qytetin rus Kazan, kryeqyteti i Republikës së Tatarstanit.
Një zyrtar i paidentifikuar i tha gazetarëve se “nëntë njerëz janë vrarë, duke përfshirë tetë fëmijë dhe një mësues. 10 persona janë plagosur, dhe katër prej tyre janë shtruar në spital”.
Sipas Agjencisë së lajmeve të Moskës TASS studentët dhe mësuesit ende po evakuohen, ndërsa disa prej tyre kanë kërcyer nga dritaret për t’i shpëtuar të shtënave.
Njëri nga autorët dyshohet të jetë një 17 vjeçar i cili është ndaluar nga policia, ndërsa një tjetër besohet të jetë akoma në ndërtesë.
Presidenti i Tatarstanit Rustam Minnikhanov arriti në vendin e ngjarjes të martën në mëngjes, duke folur me oficerë jashtë shkollës.
