TIRANË– Komisioni Qendror i Zgjedhjeve do të nisë ditën e sotme shqyrtimin e ankimimeve të partive politike për zgjedhjet e 25 prillit.
KQZ përcaktori ditën e sotme relatorët për kërkesat e dërguara me numër nga 36 deri në 46. Caktimi i relatorëve u bë me short me gogla dhe sipas Kodit Zgjedhor shqyrtimi i kërkesave duhet të bëhet brenda 24 orëve nga hedhja e shortit të KAS.
Relatorë janë caktuar Elvin Lako, Elvin Çefa, Ilir Rusmajli, Koli Bele dhe Ledio Braho.
PD dorëzoi ditën e djeshme në KQZ 10 dosje me mbi 2 mijë faqe materiale, që sipas selisë blu janë prova të manipulimit të zgjedhjeve të 25 prillit. PD kërkon shpalljen e pavlefshmërisë së procesit të 25 prillit në 9 qarqe të vendit. Të vetmet qarqe ku selia blu nuk ka asnjë pretendim janë Kukësi, Lezha dhe Dibra.
Po ashtu lëvizja Socialiste për Integrim ka ankimuar rezultatin e zgjedhjeve për qarkun e Durrësit, ndërsa më herët ka kundërshtuar procesin zgjedhor edhe në qarqet Berat dhe Gjirokastër, dhe ka kërkuar shpallje të pavlefshmërisë dhe përsëritjen e zgjedhjeve.
