Këshilli i Stabilizim Asocimit BE-Shqipëri zhvilloi sot në Bruksel mbledhjen e 11-të.
Rruga e Shqipërisë drejt Bashkimit Europian ishte në fokus të takimit mes krerëve të unionit dhe përfaqësuesve të Shqipërisë. Ndërsa zgjedhjet e 25 Prillit ishin në qendër të vëmendjes, si një rrugë-kalim shumë i rëndësishëm për vendin tonë në këtë proces.
Ministri për Punët e Jashtme në BE, Joseph Borrell dhe Komisioneri për Zgjerimin dhe Fqinjësinë e Mirë, Oliver Varhyeli, u ndalën edhe te fenomeni i shit-blerjes së votës.
“Përgatitjet për zgjedhje janë në proces. E kemi inkurajuar kryeministrin që të ndjekë të gjitha aspektet e OSBE Odihr. Sa i takon çështjes specifike të blerjes së votës, raporti i fundit i Komisoinit për Shqipërinë theksoi rëndësinë e një hetimi të është dhe transparent të akuzave. Vendimi i këshillit në mars 2020 theksojnë se nisja e proceseve gjyqësore për blerjen e votës duhet shikuar”, tha ndër të tjera Borrell.
Nga ana tjetër, komisoneri Varhelyi theksoi rëndësinë e zbatimit në terren të atyre që janë arritur nga forcat politike në Shqipëri.
“Siç edhe ju pyetët për blerjen e votës do të shikojmë në terren se ç’masa të merren. Ne duam që ligji të zbatohet. Sa i takon pyetjes që lidhet me rastet e nivelit të lartë të korrupsionit është diçka që e kemi biseduar dhe Shqipëria po bën përparim të qëndrueshëm. Nuk ka dyshim që tani na duhet të shikojmë emërimet dhe funksionin e këtyre organizmave. Kur përmenda nevojën për të ndërtuar më tej bilancin këtë kisha parasysh, edhe rivlerësimi i gjyqtarëve duhet të vazhdojë. Kjo ka qenë qasja e këtij komisioni që na duhet të bëjmë përparim në terren”, u shpreh Komisioneri për Zgjerimin.
Por deklaratat e dy zyrtarëve europianë sollën reagimin e Ramës, i cili u shpreh i befasuar rreth pohimeve se nuk është ndëshkuar asnjë person që ka blerë votat.
Sipas kryeministrit janë 20 persona, nga të gjitha partite, të hetuar për këtë çështje.
“Dua të shtoj që është mjaft mbreslënëse, të dëgjoj një deklaratë kaq të pabesueshme në gjuhën time, që askush nuk është hetuar apo asgjë nuk ka ndodhur. Ka 20 persona, nga të gjitha partitë, të ndjekur nga prokuroria, për blerje votash dhe tani që flasim janë në proces e sipër, pra po zhvillohet një proces ndaj tyre. 20 persona të dyshuar, nga të gjitha partitë, për blerje votash, meqë ra fjala. Ndaj është mbresëlënëse të shoh këtë aktivizëm dembel që shpreh vetveten në këtë tempull shumë të lartë të BE-së por ja që kështu është”, tha Rama.
